Serchhip district VC-te kawm

LAD secretary Teresy Vanlalhruaii hoin Serchhip town huamchhunga village council member-te nen an hmalakna chungchangah an inkawm.
LAD secretary chuan VC-te chu hna an thawh chhan leh sum an hmuhna hnar an hriatchian loh chuan hnathawh that a harsat avangin engkim an hriat ve vek a tul tih a sawi a. Kum 2021- 2022 ah Finance Commision rawt angin 15th Finance Commission-ah kan lut a, hmasawnna hna hrang hrang thawh mek zel a ni, tiin, Swachh Bharat Mission (G) nena thawh dunna tha tak an nei tih a sawi.
Thingtlang khaw tihhmasawn chu an thil tum bulpui a ni tih hria a, khawtlang mipui hmasawnna atana an sum hmuhte dik leh fel taka hmang thin turin a chah. Hnathawhna tur sum an hmuh veleh muangchang loa hma la thuai thin turin a chah bawk.
Serchhip district bawrhsap Paul L Khuma pawhin thingtlang tihhmasawn lam chak lehzuala thawh a nih theih nan theihtawpa tan la turin a fuih a. Faina leh thianghlimna kawngah tun aia chaka tan la thar turin a chah.
DLAO Dr C Vanlalchhanhimi chuan Serchhip district-a LAD hnathawh a sawi a. District park pahnih – Dawngzawl leh Thenzawl an enkawl mek a, Thenzawl hi PMVK hnuaiah thawmthat tum mek a ni a. Khaw hrang hrangah Gram Sabha neih a ni. Rastriya Gram Swaraj Abhiyan 2024 hnuaiah Panchayat Bhawan sakna tur Hmawngkawn, Chhingchhip leh Chhiahtlang thlan niin, Common Service Centre sakna tur Baktawngah pek a nih bakah khaw 11-ah computer set pek an ni.
Inkawmnaah hian sawrkar leh VC thawh dunna chungchang, khawtlang hmasawnna hna an kenkawhna kawnga an hriat duh leh harsatna an neih sawiho a ni.