Sialsuk lawmman dawn lawmpui

Sialsuk lawmman dawn lawmpui
Sialsuk khua in ‘Best Tourism Village – Community based category’ a India ram pumpuia lawmman an lak chu Thawhtanni khan Tourism ninister Lalrinpuii chuan a office chamber-ah Sialsuk khawtlang hruaitute a lawmpuina hun a buatsaih sak a. Tourism secretary Dr Lalrozama leh department officer-ten an telpui.
Minister chuan ram pum huapa lawmman dawng thei khua an ni chu a chhuang takzet tih a sawi a. Sialsuk chu khaw nuam tak, khualzin hip thei tur hmun mawi leh nuam tak tak tamna a ni, tiin, sawrkar pawhin theihtawp chhuahin chu’ng hmun chu a vilpui ve dawn tih a sawi. Lawmman dawng thei tura khawtlang mipui inpekna fakin, “Khualzin hip tur chuan thil dang zawng aiin a hmuna cheng mipui an pawimawh a. Khawtlang hruaituten kan khaw hmun hluite vawnghimin, hmalakna entawntlak tak tak chhunzawm zel ang u,” a ti.
Sialsuk VCP R Lalruatkima chuan Best Tourism Village an nih theih dan report a pe a. Tourism secretary chuan Mizoram tana tourism pawimawhna leh thalai tam tak eizawnna pe theitu a nih dan a sawi bawk. Sialsuk khua in community based category-a best tourism lawmman an dawng chu Mizoram nen a inhmeh a, khawtlang leh department thawhdunna that zia tilangtu a ni tih a sawi a ni.
Sialsuk khua hian community-based category-ah Best Tourism Village Awards 2024 chu kumin September 27 khan India Vice President leh Union Minister for Tourism and Culture-te hnen atangin an lo dawng tawh a ni.