Library-ah zirlaite’n lehkha an zir

Library chu lehkhabu in a ni a, hawh theihin lehkhabu an dah thin. A hmunah a chhiar theih thin bawk. Chu chu zirlaite tan thil remchang tak mai a ni a, library-ah hian lehkha an chhiar thin. Mizorama library hrang hrang pawh hi zirlaite’n lehkha zir nan an hmang thin.
Mizoram sorkar enkawl, Mizoram State Library hi Mizorama library lian ber a ni mai thei a, lehkhabu nei tha ber pawl an ni ang tih pawh a rin theih ang. He library hi hmang tangkai an awm reng a, lehkha zir nana hmang pawh an awm reng.
Mipuiin lehkhabu chhiar an thatchhe telh telh tih ngaihdan a awm a, chutih laiin a chhiar peihate chuan lehkhabu hi an ngaina, library-a kal pawh an awm reng. Mizoram State Library pawh hi a la lun reng.
“Zirlai an rawn kal a, a tam ber chu zirlai an ni ang. Exam tura inbuatsaih nan te hian an hmang a, nilenga inkhung an tam,” tiin State Library enkawltute chuan an sawi.
“Zirlaiah hian engemaw zat chu uniform ha an ni a, mahse uniform ha lo an tam zawk. Uniform ha lovah hian competitive exam atana inbuatsaih hi a tam ber chu an ni ang a, college leh university exam atana inbuatsaih pawh an awm. Regular taka rawn kal, chutiang chu an awm nual mai, tlangnel tak tak, lehkhabu awmna pawh hre chat chat khawp te an ni,” an ti bawk.
Zirlaiah hian uniform ha pawh an awm thin thu leh, chutiang chu tun hnaiah an pun thu te an sawi a, sikul bana kal thin, regular taka kal thin an pun thu an sawi.
State Library-ah hian dawhkan mahnia hman theih tur te a awm a, chutiang thutchilha chhun pachanga lehkha chhiar ngat ngat hmuh tur hi an awm reng.