TNAI Mizoram-in Jubilee lawm

TNAI Mizoram-in Jubilee lawm
Trained Nurses’ Association of India (TNAI), Mizoram Branch chuan kum 60 a tling ta a, Diamond Jubilee hi Zirtawpni khan Mizoram hmun hrang hrangah hman a ni.
Aizawla hmanpuitu Health & Family Welfare minister Lalrinpuii chuan nurse-ten pawl huapzo tak an nei chu lawmawm a tih thu a sawi a. Nurse-te chu thlei bik nei lo leh mahni inphata rawng bawl thin an nih angin, an chanvo ropui zia ngaituah thin turin a chah. An inlungrualna chu vawngnung zel tur leh hmasawn zel tura fuihin, Mizoram leh India ram pawn thleng pawha hna thawk tura thawn chhuah tlak (export quality) neia tan la zel turin a fuih bawk.
Jubilee hi North-East Region TNAI Hqrs. vice president Cheryl Susan Tada chuan a hmanpui bawk a. Nurse-te chu inhlanna leh tumruhna nena an eizawnna kawng zawh turin a chah a. Hun kal tawh atanga inzir fo thin a, an tun hun chu tangkai taka hmang a, hmalam huna beiseina sang tak nei thin turin a chah a ni.
Nurse kalkhawmte hian an thutiam chham rualin, senior member kum 80 chin chunglam chawimawina hlan an ni.
Trained Nurses’ Association of India hi kum 1908-a din a ni a, Mizoram Branch hi August 1964-a din a ni. Tunah hian TNAI life member 4053 awmin, Mizoram branch bik hnuaiah member 2751 an awm. District branch 10 awmin, Mizoram pumah nurse zirna in 17 a awm mek a ni.