Duh leh mamawh ngah lutuk chuan eiruknaa fihlim a har – Lalthansanga

Duh leh mamawh ngah lutuk
chuan eiruknaa fihlim a har
– Lalthansanga
Corruption do dawn chuan mamawh tih tlem a ngai a, mihringin duh leh mamawh ngah lutuk chuan eirukna leh hlemhletna laka fihlim a har thin tih minister Lalthansanga chuan a sawi.
Sinlung Hills Council inthlan neih tura campaign mek ZPM hruaitu Lalthansanga chuan kan ramah chibing inthliarna a lo awm tawh thin a, ralthuam lek ngai hial khawpin Sinlung bial mipui ensan kan lo ni thin, tiin, chu chuan mipui rilruah nghawng duhawm lo tak neiin, ensan bik leh hawisan bik tlangdung nia inngaihna lian tak a awm ta a, chutianga rilru leh dinhmun ata Sinlung Hills mipui chhanchhuak turin kalphung thar mipui sawrkarah beiseina thar a lo piang ta tih a sawi.
“Kawng hrang hranga Sinlung Hills mipui dinhmun chawikang tur leh leirem in lo rah theihna turin Pu Lalduhoma kaihhruai ZPM ministry a inhawng zau hle a, sawrkar hmasate hun laia zangkhaw bungbut hnan tia sawi thin tlangdung tan hian khua a var ve tawh dawn a. ZPM chuan ram rorelnaa Pathian ram tundin kan tlangaupui a, Sinlung Hills Council-ah hian chunglam malsawm tlak leh hriatpui tlaka hna kan thawh a pawimawh hle. Corruption do dawn chuan kan mamawh kan tih tlem a ngai a, mihringin duh leh mamawh kan ngah lutuk chuan eirukna leh hlemhletna laka fihlim a har thin,” a ti.
Politics-ah eptu party-ten an bei mek a, tunlai khawvel thiamna sang tawhah mi thenkhat chuan kalphung hlui leh thu belhchian dawl tawk lo hmangin mipui rilru kaihhruai an tum thin tih minister hian a sawi. “Media a chak tawh a, mipui pawhin thudik leh dik lo chik hmasak nachang kan hre zel tawh a, thudik tawk lo hmanga inbeih chu reiloteah mahni mawnghlimna mai a lo chang leh thin. Kan politics khelh danah fimkhur tlan a ngai ta hle,” a ti.
Ei leh bara kan la intodelh lo hle chuan min ti chhangchhe hle tih a sawi a. Pathian zara an kuta rorelna a tlak hnu in zan mu mangloa ngaihtuahna sen chang an ngah em em niin a sawi bawk.