AR ho zilh turin Union MoS ngen

AR ho zilh turin Union MoS ngen
BJP Mizoram hruaitute chuan tunhnaia minister chunga Assam Rifles chet danah inrawlh a, a tul anga thu tha hrilh turin an ngen tih Union minister of state for Home hnenah ziakin an thlen.
BJP Mizoram State president Vanlalhmuaka leh BJP legislature party leader Dr K Beichhua te chuan Union minister of state for Home Nityanand Rai hnenah lehkha thawnin, Assam Rifles chu mipui thlan laka an chet dan chungchangah inrawlh a, mipui thlante leh mipui mimir laka zahna lantir tura hrilh turin an ngen. BJP hruaitute chuan Assam Rifles chet dan chu minister leh a hote bakah India hnam puanzar zah lohnaa an ngaih thu an sawi a. Minister car darthlalang vua-in kaltlang a phal lo bawk nia sawiin, he Assam Rifles pa hi Police-in an la a, thubuai siamsak loin an chhuah leh niin an sawi. Minister leh amah zuitute hi Assam Rifles ho vekin Ngopa leh Aizawl khawpui luh dawn Bungbangla bulah an lo tiding leh bawk niin an sawi.
Mizoram chu India rama state ralmuang ber pakhat a nih avangin thenawm ram Myanmar leh Bangladesh bakah Manipur-a harsatna tawkten inhumhimna atana an pan a ni tihan sawi a. Hetiang a nih lai a, Assam Rifles-in mipui aiawha thlantlinte an lo tibuai nia sawi chu chhuichiang a, thil dik lo a awm a nih chuan a tidiklotu chu hrem ngei turin an phut tih an thlen a ni.