Dortmund laka comeback ropui changtu Madrid

Dortmund laka comeback ropui changtu Madrid
Thawhlehni zanah Uefa Champions League kal lai league stage khelh chhunzawm niin, Santiago Bernabeu khelmualah first half chhungin mualneitu team-in goal hnih ngawt an chhuah a, second half-ah pui taka kirin Spanish giants-in an kawtkaiah 5-2 hnehna an changlet.
Nikum final-ah Real ngam loin Bundesliga club hi sihnih faiin an tlawm a, kha mi tuma an chak loh phuba la tur niawm takin Borussia Dortmund hian half time-ah sihnih faiin hma an hruai hman a; mikhual goal hmasa zawk hi minute 30-a Donyell Malen tihluh niin, minute li hnuah Englishman Jamie Gittens chuan a khungbelh a, Bernabeu chhunga mipui 74,642 pungkhawm tam zawk an ngawi thuap!
Second half tir lam minute 60-ah Antonio Rudiger chuan sang taka zungin Spanish champion goal khatna a tauhlut a; he goal an thah leh hlawt tihah Vinicius Junior chuan he match-a a goal thum thun zinga a hmasaber a khung.
Hun pangngai tawp hma minute sarih chauh awm tawhah captain Lucas Vazquez chuan 3-2-a mualneitu team hmahruailetna goal thawh ve lehin, minute thum a kal leh a, Brazilian Vinicius-a goal hnihna a lut a; hun pekbelh minute thumna a zawh hmain Vinicius bawk hian he match-a a goal thumna leh Real goal ngana ni bawk a thawh leh a, Champions League home match-a vawi 14 tlawm pumpelh kal mek Real Madrid-in an kawtkaiah tlawm an pumpelh leh ta a ni.
2-2 a nih lai khan mikhual captain Julian Brandt-a close-range shot pui zet kan hmu phe zuai a, mahse, Real keeper Thibaut Courtois chuan engtin tin emaw a kein a lo dang thei hram a, minute khat a liam leh rualin Vazquez chuan Real hmahruaina goal a khung a, mualneitu team an hawikir lo chhunzawm ta zel a ni.
First half-ah khan a nawr lamah Real an talbuai tlat a, tlarhma lama an innghahna lian pahnih Kylian Mbappe leh Jude Bellingham inzawmna a fuh thei lo a, goal pawh an khung zo ta lo ve ve a, an pawlte goal tur erawh an siamsak ve ve thung.
Karleh Thawhtannia Ballon d’Or award dawng tura beiseiawm zinga mi Vinicius Jr khan danglamna a rawn thlen ta a, Brazilian goal hnihna phei chu a pui hle a, an lam half atangin veilam sirah ball a tlanluhpui ngat ngat a, box tlang hriam lai atangin mikhual goal-ah a thun er zawk a, Real tan inelna hrang hranga ‘hat-trick’ vawithum a siamna leh Champions League bika a vawikhatna a ni.
A vun rawng hang thim thal avangin he winger hian diriam leh deusawh hlawh thin mah se Madrid damna thlentu a ni leh thin!
Dortmund goal hnihna khungtu Gittens kha goal a thun laiin kum 20 leh ni 75 chiaha upa niin, Englishman zinga Real Madrid laka goal khung thei naupang ber ni reng thin Alan Smith-a record (20 years & 129 days) a khum a; Smith khan kum 2001 March thlaah Leeds tana a khelh laiin record hmasa a siam.
Carlo Ancelotti team Real kha league phase match thum an khelh tawhah vawihnih chakin, vawikhat an tlawm a, Dortmund nen an record a inang chiah.
AC Milan 3-1 Club Brugge
Milan chuan tun season Champions League-a an point hmasaber hlawhchhuakin, Belgian champion Club Brugge laka an goal hnih hi second half-a Dutch midfielder Tijjani Reijnders tihluh a ni a, goal khat hi first half-a Christian Pulisic-a thawh a ni thung.
Vawisarih ngawt European champion ni tawh Milan hi game hnih khelh hnua hnehna chang zo lo team pariat zinga pakhat niin, an bultanna inkhelah 3-1-in an mikhual Liverpool an ngam lo a; tunthla tir lam khan Bayer Leverkusen khelmualah sikhat faiin an tlawm zui leh bawk.
Thawhlehni zan Stadio Giuseppe Meazza inkhelah erawh fans 58,649 hmaah hnehna an sualchhuak ve ta nge nge a, minute 34-a goal hmahruai khungtu leh Chelsea forward hlui ni bawk Pulisic kha season kal laiah kumin bika Milan top scorer ni chhunzawm zelin, inelna hrang hrangah goal 15 a tilut tling chiah a; Serie A bikah goal nga thun tling tawhin, Champions League goal hnih a nei tawh bawk.
First half tawp dawn minute 40-naa Raphael Onyedika hnawhchhuah a ni kha mikhual team-in an tuar a tih loh theih loh ang.
Second half tir lam minute 51-a Belgian team goal neihchhun thawhtu substitute Kyriani Sabbe kha kum 19 mi niin, Champions League-a Milan laka rawlthar goal khung thei palina a ni.
Milan boss Paulo Fonseca chuan kha game-ah khan khel tha pangngai Rafael Leao a lachhuak a, home fans an lawm lo a, an coach thutlukna diriamin thawm an chhuah a, mahse, he inthlak an hmuh atanga second reiloteah Leao thlaktu Noah Okafor chuan Dutch midfielder Reijnders-a goal hnihna a siamsak.
Rawlthar kum 16 leh ni 226-a upa ni chunga khelmual lut Francesco Camarda kha Italian player zinga Champions League game khel thei naupangber thar a ni.
Season liamtaa group stage pel zo lo Milan hian November ni 5-ah champion lai Real Madrid an luhkhung leh ang.
Brugge hian an bultanna inkhelah sithum fai ngawtin an mikhual Borussia Dortmund an ngam lo a; a hnuah sikhat faiin Austria ramah Sturm Graz an hneh a; November ni 6 khian Aston Villa an mikhual leh dawn a ni.
Juventus 0-1 Stuttgart
Hun pekbelha substitute El Bilal Toure goal hmangin Bundesliga club-in an mikhualna hmunah point thum an thawkchhuak a; hun tawp hma minute ruk la awma Brazilian Danilo hnawhchhuah a ni kha mualneitu team-in last minute-a an nawr nat tawk loh chhanah a puh theih awm e.
Stuttgart tan tun kha Champions League league phase-a an chak vawikhatna niin, Allianz Stadium-a mipui 41,306 pungkhawm hmaah Juventus player-te’n meikhupin khelmual an chhuahsan!
Point li hum tling ta Stuttgart hian November ni 6-ah Atalanta an mikhual ang a; a hma ni chiahin point ruk nei tawh Juventus leh Lille an inkhel ang.
Tun kha season kal laia Juve tlawm vawikhatna niin, an hneh loh German club ber kher hi he competition-a chak ni hmel la hmu ngai lo an ni!
Inkhel dangah Paris St Germain leh an mikhual PSV Eindhoven chu goal khat ve ve thunin an inhnehtawk a; Kylian Mbappe thlaktu tur la zawng hmu zo lo PSG hian Champions League game thum an khelh tawhah goal khat chiah an la thun zo! Ligue 1 champion hian point li an nei tawh.
Thawhlehnia PSV laka PSG starting lineup kha kan en chuan an career-a season khat chhunga goal 15 chuang khung tling pakhat te mah an awm lo a, fullback Achraf Hakimi goal hmangin an kawtkaiah point khat an thawkchhuak thei hram a ni!
36-team league khelh mekah Luis Enrique team khan first round-ah sikhat faiin Girona an hneh hram a, La Liga club an hnehna goal awmchhun kha ‘own goal’ a nih avangin an puala goal lut awmchhun chu goal khat chiah a la ni.
Spain leilungah sihnih faia Slovan Bratislava hnehin Girona chuan Champions League chanchina a vawikhatna atan hnehna an chang a; second half-a home team goal hnihna khungtu Juanpe kha Spanish player zingah Champions League debut-a goal khung thei upa ber dawttu a ni.
Spanish club goal hmasa zawk hi chawlhlawk dawna Everton loanee hlui Arnaut Danjuma cross atanga Miguel Gutierrez thun a ni.
Point thum hum chunga table-a 20 luahtu Girona hian November ni 5-ah Dutch team PSV Eindhoven an hmachhawn leh ang.