EPL hmahruaitu Manchester City

Inrinni zan khan English Premier League 2024-25 khelh chhunzawm a ni a, champion lai Manchester City chuan Southampton an hneh a, hmahruaitu Liverpool lehpelin hmahruaitu thar an ni. Inrinni zana inkhel dangah Brentford an hneh a. Inkhel dang pathumah chak zawk an awm thei lo thung. Goal nen Haaland a kir
Season tir lama bul tan tha a, goal thun nghal pup pup Erling Haaland chu goal thun lamah a awl hlek a, goal a thun thei lo zawn. Champions League-ah goal hnih a thun hnuin Haaland hian EPL-ah lamah goal a thun zui leh a, Southampton lakah City a chakpui.
Champion lai Manchester City hian Etihad Stadium-a an mikhual Southampton lakah bul an tan tha viau a, goal an thun hma hle. Inkhel tan atanga minute ngana lekah Erling Haaland chuan Matheus Nunes siamsak atangin hmahruaina goal a thun. Hma takah goal an thun vangin City an phur a, inrtawkna sang zawk nen an mualah an inlan chhunzawm. An mikhual Saints lakah goal tam zawk nen an chak theih ngei a rinawm viau naa hun tawp thlengin goal dang an thun belh thei lo teh tlat thung. Goal thun belh thei lo bawk mah se Haaland goal thun hmangin City hian point thum an hmu.
City chakpuitu Erling Haaland hian EPL season-ah City tan inelna hrang hrangah goal 14 a thun tling leh der tawh. EPL top-scorer ni zawn tawh Norway forward Haaland hian EPL-ah match 9 atangin goal 11 a thun tling leh der tawh a, season tharah EPL-a goal thun hnem ber a ni leh mek.
An mikhual Southampton lakah an chak leh tak vangin Manchester City hi match 32 chhung tlawm nei lovin an kal tluang ta chiah a. EPL ah tlawm nei lova an kal tluan rei ber tum a ni a, an club record an tizau deuh deuh zel. Saints lakah an chak vangin Pep Guardiola enkawl City hian khelh 9 atangin point 23 an hmu a, hmahruaitu thar an ni. An hnuai chiaha awm Liverpool chuan nizan khan team lian Arsenal an hmachhawn a. Liverpool hi an chak a nih chuan City hi pahnihnaah an tlahniam zui leh thung dawn a, point khatin Reds an phak lo a ng.
Brentford an chak
Inrinni zana inkhel hmuhnawm tak, goal sarih ngawt luhna inkhelah Brentford chuan an mikhual Ipswich Town an lehthal a, 4-3 in hnehna an chang. Ipswich hnehtu Brentford in table laihawl chung lam an luah a, kai thar Ipswich Town erawh chuan table hnuai lam an luah chhunzawm ve thung.
Brentford hian an mualah bul an tan tha lo va, si hnih ngawt an phur hmasa. Ispwish tan hian Sammie Szmodics chuan minute 28-naah hmahruaina goal a thun a. George Hirst chuan minute 31-naah an goal hnihna a thun zui leh zat bawk a, goal hnih ngawtin mualneitu lakah hma an hruai.
Si hnih an phurh hnuin Brentford an insiamtha a, an vannei tel bawk. Brentford tan hian Yoane Wissa chuan minute 44-naah goal thunin an si phurh a sut then a. Chawlhlawk hma hun pek belh minute 45+1-ah Ispwich player Harrison Clarke chuan an lamah a ti-goal a, mualneitu si phurh a sut zawh sak a, 2-2 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm hle a, penalty hmuh tur a awm bakah redcard phawrh a ngai bawk. Minute 51-naah Brentford in penalty an hmu a, Bryan Mbeumo chuan awlsam takin a pet goal a, hma an hruai letna goal a thun. Hnufual zawk an nih hnuin Ipswich Town an talbuai a, recrd an hmu zui leh a, Harrison Clarke chu minute 69-na lekah hnawhchhuah a ni.
Tlem zawk ni mah se Ipswich Town tan hian Liam Delap chuan minute 86-naah goal thunin an si phurh a sut leh tlat thung. An mikhualte nen an inhnehtawk mai dawna a lan hnu, hun pek belh tawn dawn hnaih minute 90’+6-ah Bryan Mbeumo chuan goal pawimawh tak thunin Brentford an chakpui zui ta a ni.
Inrinni zana inkhel dangah Aston Villa leh AFC Bournemouth te chuan inkhel hmuhnawm an lantir a, 1-1 in an inhnehtawk.