Dortmund an buai chhunzawn

German Bundesliga-ah khelh thum an tlawm zawn vanga buai mek Borussia Dortmund buai a kal tluang a. Bundesliga-ah pa 7-na ni mek Dortmund hi German Cup second round VfB Stuttgart hneh lovin an tla.
Borussia Dortmund hi an len luhna mual Volkswagen Arena-ah an khel chhe lem lo viau a, penalty shoot-out thleng turin an tang tluan teuh hle. He inkhel hmuhnawm takah hian hun rei tak chhung goal lut a awm thei lo. Minute 90 chhunga goal lut a awm theih loh hnuin extratime-ah pawh goal a lut lawk thei lo. Hun tawp dawn hnaih minute 117-naah mualneitu VfB Stuttgart tan Jonas Wind chuan goal pawimawh tak a thun a, team lian Borussia Dortmund hnawtchhuak in, third round an inhlangkai ta a ni.
Dortmund an tlak lai hian season thara chetha tak RB Leipzig chuan an mualah hnehna an chang a, third round an lut. RB Leipzig hian an mualah St. Pauli an mikhual a, 4-2 in hnehna an chang. Mualneitu RB Leipzig hian bul an tan tha viau a, chawlhlawk hmain goal thum ngawt an thun hman. Inkhel tan atanga minute 12-na lekah Yussuf Poulsen chuan hmahruaina goal a thun a. Minute 17-naah Christoph Baumgartne-a’n an goal hnihna a thun hnuin hmahruaina goal thuntu Poulsen chuan minute 30-naah an goal thumna a thun zui leh bawk. An goal lina hi mi nute 80-naa Antonio Nusa thun a ni a. St. Pauli goal hnihte hi Morgan Guilavogui leh Eric Anders Smith te thun a ni.
RB Leipzig rual hian Bundesliga champion Bayer Leverkusen pawhin hnehna an chang ve bawk a, Xabi Alonso team te hian an mikhual SV 07 Elversberg chu 3-0 in an hneh a. Leverkusen tan hian Patrik Schick chuan goal hnih a thun a, Aleix García-a’n goal khat a thawh ve bawk.