Lehkhathiam banah chauh an kai – Congress president

Lehkhathiam banah chauh an kai
– Congress president
ZPM sawrkar hmatheh ber Bana Kaih policy chu lehkhathiam tan chauh a ni tih Congress president Lal Thanzara chuan a sawi.
Zirtawpnia Congress Bhavan-a inkhawmah Lal Thanzara chuan, inthlan hmaa ZPM-in Bana Kaih policy an tlangzarhah khan mipui chawikan chu an sawi tam ber leh tlin chhan a nih laiin, hma an han la a, central hnuaia scheme awm sa, Prime minister Manmohan Singh hunlaia bul tan MSME leh PMEGP leh, Prime minister Modi bul tan PMYY, SUI leh KCC chu vauchher berah an hmang tih a sawi.
“Bana kaih hi intiamkamna harsa tak hnuaia kalpui tur niin, lehkhathiam tan chauh a ni a, lehkhathiam lo tan beisei tur a awm lo. Congress-in NLUP a kalpui kha chu lehkhathiam lo pawh a huam vek a, nuai khat aia tlem loin chhungkaw 131940 tanpui an ni,” a ti.
Assam Rifles insawnchhuah tur chungchangah Congress sawrkar lai khan Prime minister Rajiv Gandhi chuan an insawnchhuah tur thu a lo puang tawh a, Congress sawrkar pawhin a bawhzui zel a. Vawiina sawrkar pawhin a bawhzui tih MPCC president hian a sawi. AR hotute leh chief minister chan General Administration Department amiten inremna an sign nia a lan thu leh an chhuahsan ni tur chu khawvel puma intihder ni, Arpril 1 nia sawi a nih thu a sawi.
Assam Rifles chu Union Home ministry hnuaia awm an nih angin state Home department chu a meizang hlaptu tur an nih laiin, AR insawnchhuah turah hian Home department officer-te chu an hawihai hle a, sawi tur pawh an hre lo niin a sawi. “Enchhin court-ah hian Home department leh chief minister chan department hi an inkhel emaw tih mai tur a ni,” a ti.
Health minister Pi Lalrinpuii’n press conference-ah Mizoram sawrkarin Universal Health Care Scheme, cashless-in kum khatah cheng nuai 5 zel hman theih tur chu August 2024 atanga hman tan a nih tur thu a sawi tih Lal Thanzara hian sawiin, “Party office-ah leh Lawngtlaiah pawh a puang a. Concern minister-ten an puan hi chu thudik ngei ni tura ngaih ni mah se, vawiinah chuan health care cheng nuai khat a inziahluh tur an ti leh a ni,” a ti.
Pathian zarah hunthar a her chhuak anga, NLUP chu a hma aia tha leh changtlunga kalpui an tum dawn tih Congress hruaitu hian a sawi a. Congress a sawrkar leh chuan BPL awmlohna state ni turin theihtawpin an bei dawn tih a sawi.