Serchhipah 100% LPG home delivery

Serchhipah 100% LPG home delivery
Serchhipah chuan zaah za in gas home delivery an kalpui tawh a. Zirtawpni khan Serchhip District Consumer Association buatsaihin Serchhipah lawm a ni.
Hmanpuitu Food, Civil Supplies & Consumer Affairs minister B Lalchhanzova chuan Aizawla kalpui hleihtheih loh LPG home delivery Serchhipa tha taka kalpui a ni chu ropui a tih thu sawiin, midang zirtirtu ni zel turin a chah.
District Consumer Association tha tak a ding chu lawmawm a tih thu sawiin, “Kan vai hian bumna tawk thei vek kan ni a, chu’ng hunah chuan consumer pawl chak tak kan mamawh a ni. FCS&CA department chuan consumer association hi kan thawhpui leh hmanraw pawimawh tak an ni a; sawrkarin tih dik loh a neih pawh min khalhngiltu tur an ni a, tha takin kan thawk ho zel dawn a ni,” a ti.
Serchhip District Consumer Association hian eirawngbawlna gas buk dik taka mipuiin an lak theih nan hma a la thin a. Home delivery hi gas buk dik leh tling tha mipuiin an dawn theihna tha a nih avangin Serchhip P&E Veng atanga bul tanin, 2022 May 10-ah home delivery puitlingah puan a ni. Serchhipa veng hrang hrang 17-ah delivery 100% kalpui a ni ta a ni.