AFC Award an sem…

AFC Award an sem…
Seoul khawpuia Asian Football Confederation (AFC) Annual Awards 2023 semchhuah takah Qatar forward Akram Afif chuan a tum hnihna atan AFC Player of the Year award a dawng a; women’s title chu Japanese striker Kiko Seike kutah a lut thung.
Kumin February thla khan kum 27-a upa Al-Sadd forward hian Asian Cup-ah Qatar a champion-pui a, tournament chhunga goal riat khungin, Asian Cup final-a hat-trick siam thei hmasaber a ni a, AFC award hlui ber thlannaah Jordan mi Yazan Al-Naimat leh South Korean Seol Young-woo a hmakhalh ta a ni.
Kum 2019-a he award dawng tawh Afif hi vawikhat aia tam he trophy dawng thei player pathumna chiah niin, kum 1997 leh ‘98-a dawngtu Japanese Hidetoshi Nakata leh Server Djeparov of Uzbekistan (2008 & 2011)-te hnung zui leh thei hmasaber a ni.
Qatar-in an kawtkaia Asian Cup title an lak theihna atana thlawhhlawk Afif hian award a dawn zawha thu a sawiah chawimawina a dawng chu penalty pet tur ang maia a nervous thu sawi chungin a nupui bakah national team member, coach, administrator leh medical team-te zawng zawng chungah lawmthu a sawi a, a vawithumna atana dawn leh ngei a tum tur thu a tarlang tel.
Hmeichhe player of the year award dawngtu Seike chuan kum hmasaa dawngtu Australia nula Sam Kerr hmun a luah a, nominee-a a elpui lian pahnih Australian Cortnee Vine leh Kim Hye-ri of South Korea hmakhalhin, Japanese player zinga he title dawng thei palina a ni a; a hmain a chipui rualkhat – Homare Sawa, Saki Kumagai leh three-times winner Aya Miyama-te’n Asia khawmualpui huapa kum khat chhunga hmeichhe player tha ber nihna hi an lo chang ve tawh a ni.
Striker Seike hi nikuma Urawa Red Diamonds-in Asian Women’s Club Championship title an lakna kawngah a chetha a; kumin July thlaa Brighton & Hove Albion-in an sengluh hma khan a chhuahsan tak club chu Japanese domestic league title an kawl lai a humhimpui bawk.
Japan national team lama hun a hman a ngaih avangin award sem zanah Seike hi Seoul khuaah a inlan ve thei lo a, video message kaltlanga a thu thawn chu tarchhuah niin, chawimawina a dawn avanga a hlim em em thu sawi chungin a club leh national team tana theihtawp a chhuah chhunzawm zel tur thu leh Asian football hlutna tisang zel tura tan a khawh reng tur thu a sawi.
Tottenham Hotspur player Son Heung-min chuan AFC Men’s International Player of the Year award dawngin, Australian Ellie Carpenter kutah women’s award a lut thung a; he chawimawina hi Asian competition pawn lam, khawvel zau zawk huapa huhang neiliante dawn mi a ni.
Kumin Olympic Games-a quarter-final hruai thlengtu leh Under-23 Asian Cup-a Japan champion-puitu Go Oiwa kutah Coach of the Year title an hlan a; South Korea Under-20s coach Park Young-jeon chuan women’s title a dawng ve bawk.