Zuckerberg-a sana manto

Zuckerberg-a sana manto
Khawvela pa hausa ber te zing ami a ni a, cheng vaibelchhe khat tih vela buai lo tura ngaih a ni. Mahse, Meta CEO Mark Zuckerberg hian sana a bun ngai lem lo a, kumin kumtir lama India pa hausa Ambani mo lawmna a a rawn tel tumin moneituin sana manto a bun chuan a mit a la ta riau a nih hmel a, tunah chuan sana manto a bun ve ta tlat mai.
Zuckerberg hian Instagram-ah a nupui nena an thlalak a post a, chutah chuan a sana bun hi a lang tel a, chu chuan ngaihven a hlawh ta a ni. He thlalaka a sana bun hi Patek Philippe sana niin, cheng vaibelchhe khat chuang man niin an chhut.
Thlalak hi September ni 2-a a post daih tawh kha a ni a, mahse, a sana chungchang hian chanchinthar a neih chhunzawm ta zel a ni. A nupui Priscilla Chan darah a kuah a, chutah chuan sana hi chiang vak loin a lang a, mahse, hetilam ngaihventu te chuan Patek Philippe a ni tih an hre nghal chat tho.
Instagram-ah hian Zuckerberg hi a sana chungchang hi pakhatin a zawt a, “Patek Philippe eng model nge?” tiin a zawt a, hei hi Zuckerberg hian chhangin, “5236P” a ti. 5236P chu Patek Philippe Calatrava Perpetual Calendar tihna a ni.
Patek Philippe website hian an sana man hi an tarlang lo va, chu chu hetiang sana manto chi-ah hi chuan an tidang phung niin, a man an tarlang ngai lem lo. Mahse, a man hi a model leh an hmanraw hman te leh a feature an dah belh dan a zirin dollar 1,20,000 atanga 1,50,000 man te a ni hlawm.
Meta CEO hi March thla a Anant Ambani nupui neih tur lawm lawkna Jamnagar-a an neihah khan a rawn tel a, hetah hian video pakhat Zuckerberg leh a nupui ten Anant Ambani sana chungchang vel an sawipuina a awm a, an inbiaknaah hian Zuckerberg hian, “Sana bun tumna hi ka lo nei ngai em em lo a…ka duh ve tawh maithei a ni,” tiin Ambani chu a sana siamtu te a zawt chiang a niawm e.
Hemi tum hian Anant Ambani hian Richard Mille RMS-10 Tourbillon Koi Fish sana a bun a, 18 carat rose gold leh lunghlu a chei niin, koi fish 3D design a nei tel a, he sana man zat chiah hi hriat ni lo mah se heti lama tuite chuan Ambani sana hi a lo berah pawh cheng vaibelchhe 8.4 man vel ni turin an chhut a ni.