Inngaihzawnna dika thil inthlak thin te

Inngaihzawnna dika thil inthlak thin te
Ngaihzawng kan nei a, kan inhmangaih hle a, kan ngaihzawng ten awm se min duh danin inthlak danglam te kan tum thin. Mahse, inngaihzawnna boruak dikah chuan, kan ngaihzawng ten awm se min tih vang emaw lam ni lovin, ama tawka thil inthlak danglam a awm mai thin a, chu chu inlaichinna a ngheh telh telh khan i hrethiam thuai ang. Tun tumah hian relationship lama mithiam ten inngaihzawnna boruak dika thil inthlak danglam thin ni a an sawi te kan rawn tarlang e.
1. Ngaihpawimawh zawng a lo danglam thin. I ngaihzawng nena in inlaichinna chu thil thenkhat aia dah hmasak leh dah pawimawhah i nei thuai ang. Ngaihzawng/ kawppui te chu an sawi kher pawh ngai lovin kan ngaipawimawh riau a, kan thil tih dawnah te anmahni kan ngaichang a, a ngaihdan te hriat hmasak duhna kan nei thin. Chutiang chu kan ni ve ve a nih chuan kan ingaihzawnna chu kan la thutak ve ve tihna a ni.
2. Ngaihzawng/kawppui te tihlawm lawm loh hlauhna a bo. Inngaihzawn tanah chuan tih lawm loh hlau deuh a nun chep riaua awm chang te pawh a awm thin, mahse, kan inlaichinna a dik that chuan intih lawm loh hlauhna a bo a, a bula tawng sual leh chetsual hlauhna a awm tawh lo a, a bulah chuan i thawveng a, engmah venthawn a ngai ngai lo.
3. I thil tum te pawh a inthlak ang. I hmachhawp leh thil tum te chu nangma tan chauh a ni tawh lo ang a, ani chu i telh ve tawh ang a, chutiang bawkin ani pawhin a hmathlirah a telh ve tawh ang che.
4. In inngaihzawnna chu ‘inngaizawng satliah’ anga i ngaihna atangin eng emaw nghet riaua hriatna i nei ang a, i tana awmze nei leh hlu riaua hriatna i nei ang. I ngaihzawng laka i rilru put dan pawh a ‘romantic’ lam ringawt a ni tawh lo ang.
5. In ngaihdan a inang thei ta riau em? I duh dan te pawh a inmil thei ta riau em? Chutiang chu in nih chuan in inngaihzawn dan boruak a tha hle tihna a ni ang. A hma chuan ngaihdan leh duhdan inan loh chang a tam ang, mahse, in lo inthlak danglam telh telh a, hriat loh karin in rilru a lo inang ta riau a, i duh leh ngaihdan te pawh a thuhmun thei ta riau.
6. I ngaihzawng/ kawppui chu nangmah nawrkaltu che a ni ta a, ani pawh chutiang tho chu a ni. Amah avang chuan nangmah rau rau a tha ber nih theih duhna i nei ta. Chutiang chu inngaihzawnna boruak dik tihna a ni.
7. In pahniha thil tihdun a nuam ta riau ang. A hmaa i tih peih loh leh nin thin te pawh ani nena intih dun chuan nuam i ti ta riau a, chetvel pawh i zangkhai ta tlat a, in pahnih chuan eng pawh ti ula hlim takin i ti thei mai thin.
8. In inhnial dan pawh a danglam ta. A inthlak dan kha a nasa lo a nih pawhin i hrethiam ang. A hma chuan a thiam zawk leh dik zawk nih inchuhna boruak a awm thin a, tunah chuan a chak emaw, dik zawk emaw nih tum lam a ni tawh lo va, a chinfel dan ngaihtuah lam a ni tawh zawk.
9. Tunah chuan i khawvel thlir dan pawh ‘ka’ tih ringawt a ni tawh lo ang a, ‘Kan’ tih a ni tawh ang. Engkimah mahni duhdan leh mahni thu thu a tal mai tawh lovin, i thil thlir dan pawhin i ngaihzawng chu a huam tel tawh ang.