Cavaliers an chak zel

NBA 2024-25 season kal mekah Cleveland Cavaliers an khel tha chhunzawm zel a, vawi 10 an chak zawnna ni turin inrinni zing khan Golden State Warriors an hneh. Irinni zinga inkhel dangah LA Lakers in hnehna an chang ve bawk.
Season thara an khelh hmasak pakuaa chak vek Cleveland Cavaliers hian Golden State Warriors lakah bul an tan tha viau a, quarter hmasa pahniha an hmahruaina an chakpui. Quarter hmasa pahnihah an khelh that em vangin quarter hnuhnung pahniha an hnufualna nghawng pawi a nei phak tawh lo.
Cavaliers hian an khingpui Warriors an ngam viau a, quarter khatnaah point 17 zetin hma an hruai nghal. Fal taka hma an hruai hnuin quarter hnihnaah an khel tha zui leh viau a, point 24 zetin an chungnung. Chawlhlawk a nih meuh chuan point 41 zetin hma an hruai fal tawh a. Chawlhlawk hmain chak tur zawk a chiang der tawh a ni ber mai.
Quarter hmasa pahnihaah khelh chhe viau mah se chawlhlawk hnu lamah Warriors an insiamtha a, an mualpho lutuk tur thup mawi nan chungung zawkah an tang ve ve. Warriors hi quarter thumnaah point 12 in an chungnung phawt a. Quarter hnuhnung berah point 10 zetin chungnung zui leh mahse an khingpuite hi 19 zetin an phak lo va, 136-117 in tlawm zawkah an tang zui ta tho a ni.
Tarlan tawh angin season tharah Cleveland Cavaliers an khel tha viau a, Warriors an sawp hnuin vawi 10 an chak zawn ta chiah. NBA ah hian season tharah vawi 10 chak zawn thei team 15 an awm a, chung zinga thar lam ber chu Cavaliers hi an ni. Warriors an hneh tum hian Darius Garland chuan point 27 a thawkchhuak a, hei hi season kal mekah point a thawhchhuah hnem ber tum a ni nghe nghe.
Inrinni zinga inkhel dangah champion lai Boston Celtics chuan harsa takin hnehna an chang a, an khingpui Brooklyn Nets chu point harsa takin an hneh. Celtics leh Nets te hi hun pangngaiah an inhnehtawk hmasa zet a. Overtime-ah Celtics hi point liin an chungnung thei hram a, point 108-104 in an chak.
Inkhel dangah khelh li chhung tlawm zawn tawh Los Angeles Lakers chuan an khingpui Philadelphia 76ers chu point 116-106 in an hneh. He inkhelah hian LA Lakers player ropui LeBron James chuan point 21 a thawkchhuak a, assist vawi 13 a neih bakah ball sawhlet vawi 12 dawng tling bawkin triple-double a puitlin. LeBron James hian NBA-ah vawi 114 zet triple-double a puitlin tawh.