Lunglei Polytechnic buainaa sawrkar hma la har hi a mak – AAP Mizoram

Mizoram Polytechnic Lunglei harsatna tawh chu thla thum kalta daiha sawrkar hriattir an ni tawh chung a, hmalakna a awm lo chu mak an tih thu AAP Mizoram chuan an sawi a. ZPM sawrkarah zirlai leh zirna in harsatna a la tawk zel chu pawi an tih thu an sawi.
Mizoram AAP thuchhuak chuan, Lunglei District Court civil judge-in Mizoram Polytechnic Lunglei building pasarih khar tura a tih chu pawi a ti hle a, exam tur zirlaite rilru ah ngawng a nei ang tih an hlau hle tih a sawi.
Tuna buaina chu tunhnai maia intan nilo, thla thum kalta daih tawha sawrkara hriattirna thehlut tawh, vawiin thlenga hmalakna a awm lo chu mak an ti hle tih a sawi. Sawrkarin a rang thei ang berin hma la thuai se an duh tih a sawi a ni.
Mizoram education system-in a zir loh thin avangin tunah thalaiten buaina an tawk chho mek tih sawiin, ‘Beiseina sang tak nena kan thlantlin ZPM sawrkarah hian zirlai leh zirna in harsatna a la tawk zel hi pawi kan ti hle a, chumi tur chuan sawrkar kalta te mawhpuh reng tawh loin, research an lo kalpui tawh angin huaisen taka hma la zel turin kan ngen a ni,’ a ti.
Zirna chu ram hmasawnna leh than zelna atana pawimawh ber zing ami nia an ngaih tlat avangin zirna in hma a sawn theihnan hma an la zel dawn tih Mizoram AAP hian a sawi bawk.