Vawi 13 chak zawn thei Cleveland Cvaliers

November 14, Ningani zing khan NBA regular season khelh chhunzawm a ni a, inkhel hmuhnawm takah Cleveland Cavaliers in an khingpui Philadelphia 76ers an hneh a, vawi 13 an chak zawn. Ningani zinga inkhel dangah Spurs in Wzards an hneh a, Milwuakee Bucks leh Golden State Warriors in hnehna an chang bawk.
Season thara bul tan tha tak, an khelh hmasak 12 a chak zawn tawh Cleveland Cavaliers chuan an khingpui Philadelphi 76ers chu point 114-106 in an hneh a, season thara inkhel an hmachhawn tawhah an la chak vek. NBA-ah hian season thara game hmasa 13-a chak vek team ruk chiah an la awm a. Golden State Warriors (2015-16) hnu lamah Cavaliers hi season thara vawi 13 chak zawn leh hmasa ber an ni.
Cavaliers hian 76ers lakah bul an tan tha a, quarter khatnaah point liin an chungnung nghal. Bul tan tha viau mah se quarter hnihnaah erawh hnufual zawk an ni ve teh tlat a, an khingpuite hi point 10 zetin an phak lo va, point 6 a hnufual zawk chungin chawhlawk an hmang.
Chawlhlawk hnu lamah Cavaliers an khel tha leh ta viau a, quarter hnuhnung pahnihah chungnung zawk an ni ve ve. Quarter thumnaah point 10-a chungnungin an khingpuite an lehthal a. Quarter hnuhnung berah point liin an chungnung zui leh ta mai a, point 8 in hnehna an chang zui ta a ni. Tarlan tawh angin Cleveland hian vawi 13 hnehna an chang zawn tawh a. NBA-ah season thar game hmasa 13-a hnehna chang vek parukna an ni.
Ningani zinga inkhel dangah San Antonio Spurs chuan an khingpui Washington Wizards chu inkhel hmuhnawm takah point 139-130 in an hneh thei hram. Wizards an hneh tum hian Victor Wembanyama a khel tha viau a, point 50 zet a thawkchhuak. Wembanyama hi NBA game khatah point 50 thawkchhuak tling thei zingah naupang pawl a ni a, amah aia naupangte chu Brandon Jennings, LeBron James leh Devin Booker te chauh an ni.
Inkhel dangah Milwuakee Bucks chuan harsa takin hnehna an chang a, an khingpui Detroit Pistons chu overtime khelh a nih hnuin point 127-120 in an hneh thei hram. He inkhel hmuhnawm takah hian tum hnih Most Valuable Player lo ni tawh Giannis Antetokounmpo a chetha viau a, point 59 lai a thawkchhuak. Hei hi season kal meka point a thawhchhuah tam ber a ni nghe nghe. Antetokounmpo hian NBA game khata point a thawhchhuah tam ber chu season liam taah Detroit Pistons laka point 64 zet a thawhchhuah kha a ni.
Player ropui LeBron James chu season kal mekah a chetha chhunzawm a, a zawna a vawi thum nan triple-double a puitlin. Los Angeles Lakers in point 128-123-a Memphis Grizzlies an hneh tumin LeBron James hian point 35 a thawkchhuak a, assist vawi 14 a neih bakah ball sawhlet vawi 12 zet a dawng tling bawk. He inkhelah hian Anthony Davis chuan LA Lakers tan point 21 a thawkchhuak a, ball sawhlet vawi 14 a dawng tling bawk.