Mock drill buatsaih danah Mizoram a titha zing ami – NDMA sr consultant

Mock drill buatsaih danah
Mizoram a titha zing ami
– NDMA sr consultant
Table top exercise leh mock drill buatsaih kawngah India ram state zingah Mizoram chu a titha ber zing ami a ni tih National Disaster Management Authority senior consultant Brig.Ravinder Gurung chuan a sawi.
November 14-a Mizoram district headquarters tina chhiatna thlen thulha chet lak dan tur entir chhin enpui tura NDMA-in a rawn tirh Brig.Ravinder Gurung leh Disaster Management & Rehabilitation minister K Sapdanga te hoin hemi tlai hian thlirlet a ni a. Tun tum table top exercise/ mock drill ah hian tuilian, leimin leh kangmei chhuah thulha chet lak dan tur entir a ni.
DM&R minister chuan mock drill hlawhtling tak buatsaih a nih theihnana thawktu Mizoram sawrkar hnuaia department hrang hrang leh sawrkar laipui hnuaia agency hrang hrang bakah tlawmngai pawl, local council/ village council leh mipui hnenah lawmthu a sawi tih sawiin, khuarel chhiatna lo thleng thulha lo inven dan leh kan tawrhna tinep thei tura chet lak dan nunchan zir chu thil tih makmawh a ni a, rah duhawm tak a chhuah ngei pawh a beisei tih a sawi a ni.
NDMA senior consultant chuan mock drill buatsaiha India ram state hrang hrang a tlawh tawh zingah Aizawl Civil Hospital anga Civil Hospital thianghlim a hmuh loh thu a sawi a. Mizoram chu table top exercise leh mock drill buatsaih kawngah India ram state zingah pawh titha ber zing ami a ni tih a sawi. DDMA chairman leh observer te atanga report a ngaihthlak chu hlawk thlak a tih thu sawiin, SDMA leh DDMA hnenah rawtna a neihte a sawi. “Mock drill hian khualrel chhiatna a lo thlen palh hunah chiai mai loa chet lak dan min thiam tir anga, chu chuan nasa takin min pui dawn a ni,” a ti.
Thlirletna thutkhawm hi district tina DDMA-ten inbiak hmuh theihna hmangin an lo chhim a ni.