VC term pawh tawi danah High Court inrawlh an hlau

VC term pawh tawi danah
High Court inrawlh an hlau
Mizoram sawrkarin village council term a pawhtawi daha High Court a inrawlh palh a hlauhawm tih PC party chuan sawiin, sawrkar chu term pawhtawi hi sut leh turin an ngen tih an sawi.
PC party thuchhuak chuan, democracy sawrkar lungphum pawimawh ber zing ami chu khawtual inawpna (village council leh municipality) niin, India sawrkarin a ngaihpawimawh zual tak avangin VC term atan MLA leh municipality term anga kum 5 hman a nih bakah sawrkar hmalaknaah khawtual inawpna ngaihpawimawh zual zel niin, khawtual inawpna pual hian sawrkar laipui chuan a hranpa ngatin sum pawh a dah tih a sawi.
Central duh dan anga khawtual inawpna kan la dah pawimawh loh avangin state sawrkarin central atangin fund hmuh theih tur hmuh loh kan la nei teuh tih a sawi bawk.
‘Party dang kaihhruai sawrkar-ten an sawrkar din hmaa lo ding tawh VC-te tha taka an thawhpui mai thin laiin, ZPM sawrkar chuan khaw hrang hranga party dang kaihhruai VC-te a thawhpui tha duh loa; minister leh MLA ten eptu VC-te an thawhpui that theih loh thu vantlang hriatah sawi foin, VC leh mipui min vau fo a. Hetianga sawrkar chakna hmanga mipui vaubet chunga VC tam tak neih tuma sawrkarin hma a la hi a pawiin a tha lo takzet a ni,’ a ti.
Dan hmangin, cabinet thutlukna hmangin, chhan tha tawk awmin VC term pawhtawi theih a ni tih PC party hian sawiin, ‘Tuna VC term an pawhtawi dan hi dan kalh a ni. High Court a inrawlh chuan sawrkar a buai khawp ang,’ a ti.
VC term pawhtawi chhan hi sawhthing hralhna an hre dawn loa an inhriat vang nia a lan thu sawiin, ‘Hetiang mai maia mipui thlantlinte zahpah lo taka sawrkar a che hi kan dem a. An thutlukna sut leh turin kan ngen a ni,’ a ti.