Sihphir kawng siam mek endik

Sihphir kawng siam mek endik
Mizoram State Project Monitoring Committee (MSPMC) chuan an vice chairman R Lalrinawma hoin Durtlang Leitan atanga Sihphir kawng siam mek chu tlawhin hmalakna an endik.
He kawng hi km. 10.250 a thui tur niin, sawrkar laipui Ministry of Road Transport & Highway (MoRTH) hnuaia Central Road & Infrastructure Fund (CRIF) Scheme atangin cheng vaibelchhe 46.57 hmuh a ni a. EPC mode-a thawh a ni. Contractor chu SLT Infracon Pvt. Ltd. Hailakandi Assam niin, agreement amount chu cheng vbch. 35.53 a ni.
He hna in a huam zingah a tul dan leh remchanna laia kawng chhuat zauh, kawngchhuat tih muk that, alkatra luan hlui haikhawh, kawngpui phah nghahchhan atan dry lean concrete 150mm (6 inch), metre 6.00-a zau phah thar, kawngpui phah thar (concrete pavement), culvert awmsa zawmsei, hume pipe culvert leh retaining wall siamte a tel.
Kawngpui siamna atan hian concrete grade sang tak hman a ni a. A siamna hmanrua pawh a tha thawkhat viau in MSPMC hian a hmu a ni. Khawl hmangin hna hi thawh niin, hna thawh tawh chin hi zaa 33 vel a ni. January 2025-a zo hman tura ruahman ni mah se, hna a khaihlak thin avangin a zawh hun tur aia rei an hman a rinawm tih sawi a ni.
MSPMC hian he hna thawk tura contractor inbuatsaihna chu a tha thawkhatin an hria a. Tha taka zawh thuai a nih theihnan sawrkar, contractor leh khawtlang hruaitute thukhat vuaa tan ho a tul tih an sawi a ni.
Endiknaah hian PWD hotute, Durtlang Local Council leh Sihphir Village Council-ten MSPMC hi an tawiawm.