Aizawlah Exhibition/ Trade Fair

Aizawlah Exhibition/ Trade Fair
Sawrkar laipuia Ministry of Micro, Small & Medium Enterprises (MSME) leh Mizoram Commerce & Industries department tangdun chuan Sipai Lammualah PM Vishwakarma Exhibition -cum- Trade Fair an buatsaih a. November 30 thleng a awh ang.
Exhibition hawngtu Commerce & Industries minister F Rodingliana chuan, kut themthiamna bik neiten an thil siam an phona tur hun remchang siamsak a ni chu lawmawm a tih thu a sawi a. Mizoram hmun hrang hrangah tualchher thil siam mawi tak tak inphum ru a hmu thin tih sawiin, hengte hi eizawnna tlak thil tak tak ni mah se, sum leh pai lama harsatna avangte, a zawrh chhuahna tur an neih loh avangte in upbo mai mai a ni thin tih a sawi.
Tuna PM Vishwakarma scheme kaltlanga sum leh pai mamawh ngaihtuah puina tur, an thiamna tihpunna tura training pek leh an thilsiam an zawrh chhuahna thlenga puihna tur scheme lo awm ta chu chhawr tangkai ngei a tul tih a sawi a ni.
PM Vishwakarma hi central scheme niin, India ram pum tan sawrkar laipuiin cheng vaibelchhe 13000 a ruahman a. He scheme hnuaiah hian khawtual mi kut themthiamte tan an thiamna chawikanna turin hamthatna ruahman a ni a, trade 18 thlan bik a awm.
Exhibition -cum- Trade Fair ah hian stall 50 chuangah tualchhung kutthemthiamten an kutchhuak thilsiam an phochhuak a ni.