Trump-a thawhpui tura thlanten bomb-a vauna dawng

Trump-a thawhpui tura thlanten bomb-a vauna dawng
Donald Trump-a’n a cabinet atan leh a White House team atana a thlan chhuah eng emaw zat chuan bomb-a beih tuma vauna an dawng.
FBI chuan heng bomb hmanga tihthaihna hi buaipuiin an bitum nia an sawi inte pawh khauh lehzuala an ven thu an sawi.
Vauna hi mi pakua vel, Trump-a’n Department of Defence, Housing, Agriculture leh Labor enkawltu tura a thlante bakah United Nations-a US ambassador tura a thlanin an dawng nia hriat a ni.
Police chuan Thawhlehni zan leh Nilainia heng vauna tihchhuahte hi an chhui zui mek.
Trump-a transition team thupuangtu, Karoline Leavitt-i chuan Trump-a’n a thawhpui tura a thlan chhuahte hian ‘tharum leh American-te tih awm loh takin an nunna leh an chenpuite nunna atana hlauhawm vauna’ an dawng niin a sawi.
Dan leh thupek kengkawhtuten an himna atan rang takin hma an la nghal tih a sawi bawk.
“President Trump-a atanga kan lo hmuh tawh angin hlauhawm, intihthaihna leh tharum hian kan kawng min dal dawn lo,” a ti.
Leavitt hian tute chiah nge hetiang vauna hi dawng a sawi lo va, FBI pawhin an puang lo bawk.
New York Republican Elise Stefanik, Trump-a’n UN-a palai tura a thlan chu an chenna in bomb tuma vauna a dawng tih sawi chhuak hmasa bertu a ni.
A pisa chuan a pasal leh an fapa kum thum mi hova Washington DC atanga New York pana Thanksgiving hmang tura an inkhalh haw laiin a dawng tih a puang.
Defence secretary atana rawt, Pete Hegseth pawhin a hnuah a dawng ve tih a sawi.
X-ah Nilaini zingah khan an inah a fate pasarih an muthilh laiin police officer-te kalin ‘pipe bomb hmanga vauna rintlak tak’ an dawng tih an hrilh tih a sawi.
A campaign laia vawi hnih that tumna tawk, Trump-a erawh chuan vauna hi a dawng ve lo niin dan kengkawngtute chuan thuthar lakhawmtute hnenah an sawi.
Tuna vauna dawngte hi tumah US Secret Service-in an ven an awm lo niin chanchinbute chuan an tar lang.
Environmental Protection Agency enkawl tura thlan, Lee Zeldin-a pawhin ‘pipe bomb hmanga vauna’ a dawng a, hei hi ‘Palestinian tanna thu nen’ a dawng tih a sawi.
“Kan chhungkuain beih min tumnahmuna kan awm lloh lai tak a ni,” a ti a. Rang taka officer-te chetna avangin lawm thu a sawi bawk.
Department of Agriculture kaihruaitu tura thlan, Brooke Rollins pawhin X-ah Nilaini tuka Fort Worth, Texas-a an chennaah vauna an dawn ruala rang taka police chetna avanga a lawm thu a tar lang.
Department of Housing changtu tura thlan, Scott Turner leh Labour Secretary atana thlan, Lori Chavez-Deremer te pawhin vauna an dawn thu social media-ah an tar lang a. Vauna avanga an zam dawn loh thu an sawi ve ve.
President Joe Biden-a hovin hetiang thil awm hi an sawiho tawh tih White House chuan a puang.
“White House chuan dan kengkawhtute be rengin president tur leh a team-te hi uluk taka vil reng an ni,” a ti.