North Korea-in uranium tihchakna hmun din thar

International Atomic Energy Agency (IAEA) chuan North Korea-in Yongbyon nuclear complex-ah uranium tihchakna hmun chhawng hnih a din tih a sawi.
Building thar hi uranium tihchakna hmanrua, centrifuge cascade 24 awm theihna a ni.
Nuclear thlithlaitu pawl director, Rafael Grossi-a ralthuam atana hman theih tur khawpa hmanrua tihchak a la ni chu ‘ngaihven ngai tak’ a nih thu a sawi.
IAEA chuan Pyongyang hian uranium an tihchakna hmun awm sate pawh zauh an tum niin a sawi bawk a. Heng thilte hi thlalem atanga thla an lak atangin an finfiah a, North Korea hian an nuclear hmunhma hi zawi zawiin an zauh zel tih a lang niin an sawi.
Kar tir lama thu an chhuahah Grossi-a chuan Yongbyon-ah in thar a awm tih a sawi a. Kum 2009-a agency atanga hnawh chhuah tawh ramah hian inspector-te an lut thei lo va, thlalem atanga thla an lak atangin finfiah bak an thei lo.
IAEA hian building thar a awm tih hi June khan an hmu tan tih August 28-a report an tihchhuahah an tar lang a. Report-ah chuan Kim Jong Un-a’n June 3 khan ‘nuclear materials production factory a hawng’ tih tar lan a ni a, hei hi Yongbyon enrichment facility a ni tih finfiah a ni.
Kim-a hian an rama ‘siam chhuah a tihpun’ avangin a lawm hle tih sawiin hei hian ‘ruahmanna lian zawk neih theihna tur a siamsak’ tih a sawi tih IAEA report-ah tar lan a ni.
IAEA hian an khawpui, Pyongyang bula Kangson encirhment facility-ah pawh January atang khan hna thawh tan a ni tih a tar lang bawk a. He hmun hi kum 2024 atang khan Kangson-ah hian sak tan a ni.
“DPRK-in nuclear programme a kalpui zel hi tun hnaia UN Security Council resolution bawhchhiatna lian tak a ni,” tiin Grossi-a chuan kar tir lamah khan a sawi.
IAEA hian April thla khan Yongbyon huang zauh zel tumna an thlirnaah North Korea-in nuclear bomb siam theih tumin hma a la tih a lo sawi tawh.
August khan South Korean President Lee Jae Myung-a chuan North Korea nena ram pahnih indona titawp tura inbiak a rawt a, hei hi ‘North-in nuclear ralthuam a neih theihna tur danna tur a ni tel’ niin a ngai a ni.
North Korea chuan he rawtna hi a la chhang rih lo thung.
North Korea hian kum 2022 tawhah khan nuclear power a nih thu lo puang tawhin ralthuam tha tam tak siam sa a neih tawh thu a lo sawi tawh bawk.
Lee-a hian a hma pawhin Pyongyang-in kum khat chhungin nuclear ralthuam 15 atanga 20 vel a siam chhuak ziah tih BBC a lo hrilh tawh a, US President Donald Trump-a leh Kim-a inbiaa siam chhuah belh lohna tura an indawrna pawh a thlawp.