Trump-a leh Putin inbia, indo tihtawp thuai duh ve ve

Donald Trump-a’n phone-a Russian President Vladimir Putin biain Ukraine-a indona chu tihtawp thuai a duh tih a hrilh a, chu chu US-Russia inkar tihthat leh vekna tur a ni tih a sawi bawk niin Kremlin chuan a sawi a. Putin-a pawhin US president thlirna hi a thlawp niin a sawi bawk.
Hruaitu pahnihte hi Thawhlehni khan darkar khat an inbia niin Kremlin chuan a sawi a. A hma lawkin US palai pahnih, Steve Witkoff-a leh Jared Kushner-a ten indo tihtawpna tura inbiak dan tur dapin Moscow leh Kyiv an tlawh tawh bawk.
Kartawpa palai pahnih zin chhuahna rah hi puan chian a la awm lo va, chutih rual chuan ram pathum – Russia, Ukraine leh US inbiak chhunzawm leh chu an sawi ri ring hle a. Kremlin pawhin hei hi a hnawl thla lo va, Putin-Trump inbiaknaah erawh an sawi ri em tih hriat a ni lo.
Hetih lai hian Kremlin hotu lian, Yuri Ushakov-a chuan thuthar lakhawmtute hnenah hruaitu pahnihte hian kartawpa US palaite chet chhuahna chu ‘thil lawmawm lam’ a nih thu leh Putin-a pawhin Trump-a hnenah hian US-in indona titawp tura a pui theitu tur a nih thu a hrilh a, indonaa thil thleng te pawh a hrilh niin a sawi.
Ushakov-a sawi dan chuan Trump-a hian a rang thei ang bera indo hi tihtawp a duh a ni.
“Donald Trump-a hian chiang takin a hma thei ang bera indo tihtawp a duh dan a sawi a, chu chuan thi tam tak keng telin US leh Russia inkar tihthat leh vekna tur pawh a tel tih a sawi a ni,” tiin Ushakov-a chuan a sawi.
“A thlirnaah hian sumdawnna leh eibara inzawmna te, ram pahnihin an hlawkpui theih dan turte pawh a tel a. Donald Trump-a hian president a nih chhunga tihhlawhtlin a duh a. Vladimir Vladimirovich Putin-a pawhin a duh dan hi a thlawp a ni,” a ti.
Russia leh Ukraine indo mek hi Indopui II-na hnua Europe-a indona lian ber ni mekin an chet danah tawp mai tur angin a lang lo hle a, an inkap tawn mawlh mawlh reng.
Trump-a palaite an zin chhuah hma lawk khan Kremlin rorelna hre chiang pakhat chuan Putin-a hian Ukraine khawchhak lam, Donetsk region-a an la thunun rih loh zawng zawng thunun a duh a, Kyiv chuan hei hi phal lovin an ralthuam neih ang ang hmang ral vek khawp pawha tan an duh niin a sawi.
Ushakov-a chuan Putin-a leh Trump-a hian mi tangte inthleng tawn leh pawh a tul tih an sawi dun niin a sawi a. An sawi dan zawng zawng sawi thei lo mah se an inbiakna chu a tha lam hawi niin a tul dan ang zela phone-a inbiak zui ni se an ti bawk tih a sawi.