Sainik School Annual Day hmang

Sainik School Annual Day hmang
Chhingchhip-a Sainik School chuan December 6 khan Annual Day vawi 8-na an lawm a, chief minister Lalduhoma bakah bialtu MLA, minister PC Vanlalruata leh MLA Lt. Col. Clement Lalhmingthanga ten an tawiawm.
Chief minister chuan Mizoram sawrkarin kumtin Chhingchhip Sainik School chu grant tam tham tak a pe thin tih sawiin, phur taka sawrkarin he school a grant thin chhan chu zirlai hlawhtling tak tak an neih theihnan a ni tih a sawi. “He school tana kan insenna hi investment-ah kan ngai a ni,” a ti.
Sainik School chu India rama school tha pawla ngaih a ni tih sawiin, Sainik School chhuak mi hlawhtling leh ropui tak tak sawi tur tam tak an awm a; Chhingchhip Sainik School pawh an beisei sang hle tih a sawi a ni.
India rama Sainik School zinga girls cadet admission nei hmasa ber a ni chu lawmawm a tih thu chief minister hian a sawi a. Zirna pangngai bakah sports, culture & tradition lamah an titha thin tih a hriat thu leh, sport-ah phei chuan national level award pawh an dawng nual tawh tih a hriatin a ti hlim hle tih a sawi a ni.
Chhingchhip Sainik School:
* April 2017-a din a ni a, India rama Sainik School 26-na a ni.
* Sainik School hi India ramah 33 an awm a, Ministry of Defence hnuaia Sainik School Society enkawl a ni.
* Chhingchhip Sanik School-ah hian class 6 -12 zirna a awm a, India rama girls cadet nei hmasa ber a ni.
* Tunah hian zirlai 388 an awm a, an zinga 52 hi hmeichhia an ni.
* A zir man hi naupang pakhat tan kum khatah cheng nuai 2 vel a ni.
* School-ah hian shopping complex thlengin a awm.