VC term pawh tawi tumnaah AMVCA leh sawrkar inbei tan

Mizoram sawrkarin village council term dinglai a pawhtawi chungchangah village council association leh sawrkar chu court-ah an inbei tan a, sawrkar tal pit tumnaah VC association lam hian umkhalh a tum leh mek. The Aizawl Post thudawn danin, Mizoram sawrkar chuan kumin November 20 khan hriattirna tichhuakin village council term dinglai, 2025 September-a tawp tur chu 2025 February 19-a tawp turin a pawt tawi a. Hei hi All Mizoram Village Council Association (AMVCA) chuan Gauhati High Court Aizawl Bench-ah khingin, December 12 khan High Court hian a ngaihtuah a ni.
Sawrkar chuan kumin November 21 khan hriattirna thar a tichhuak tih hriat niin, November 20-a hriattirna tihchhuah chu hei hian a luahlan a; sawrkar an khinna phet zawngin hriattirna thar hian tanhmun a siam tih AMVCA president K Lalngaizuala chuan a sawi.
Hriattirna chhuah thar hi a copy pek an nih ve loh avangin hria an awm loa, social media lamah pawh a darh loa, hei vang hian court-a an document thehluhah an telh lo tih sawiin, court phalna in an khinna hmasa hi an ukil kaltlangin an hnukkir a, hriattirna thar khing tel tur hian siamrem ngaite siamrem a nih hnuah Ningani vek khan court-ah an luhpui lehnghal a, vawiin – December 13 hian court-in a ngaihtuah an beisei tih a sawi a ni.
AMVCA chuan mipui lam emaw anmahni emaw pawh biakrawn lawkna awm loa sawrkarin VC term dinglai a pawt tawi chu mipui rorelna kalphung kalh nia an hriat bakah dan bawhchhiatna nia an hriat avangin, kumin November 26-a AMVCA general conference palaiten High Court-a zualko an rel tih K Lalngaizuala hian a sawi a. Sawrkar hian VC-te court-a an kal dawn nia a lan avangin sawrkar ukilte thusawi ngaithla hmasa loin, order engmah pass lo tura ngenna – Caveat chu High Court-ah hian a thehlut ve nghal bawk tih a sawi.