Compensation-a buai lohna turin lui khuah tum bulhnai ‘freeze’ vek

Sawrkarin hydel project ruahman a tumna lui chhehvelah compensation beisei vanga ram inneih siak ang chi a awm tawh lohna turin Mizoram sawrkar chuan heng lai hmun hi ram lei leh hralh theih rih loh turin dan tlawhchhan hmangin a ‘freeze’ vek tih Power minister F Rodingliana chuan a sawi. North Lungleng bula Tlawng Hydel Project khuah tumna hmun chu P&E minister ho hian department hotuten Thawhlehni khan an tlawh a. Tlawng lui khuah tum hi sawifiahin, sawrkar laipuia Ministry of Water Resources chuan Tlawng HEP survey & investigation thawhna leh detailed project report (DPR) siamna atan kum 2014 khan cheng vaibelchhe 11.55 a ruahman a, Central Water Commission (CWC) thawh tura tih niin, 2015 February khan survey & investigation a ti tan a, 2025 laihawl velah DPR siam pum beisei a ni tih a sawi.
“ZPM sawrkar chuan kum 5 chhungin power-a intodelh tumin hma kan la a, kan priority no.1 chu Tlawng lui khuah hi a ni. DPR peihfel a nih veleh sawrkar chuan he project tihlawhtling tur hian kut a thlak nghal dawn a ni,” a ti.
Lui khuah tur chhehvelah LSC leh periodic patta inpek theih loh turin an sawrkar hnu ah dan siamthat a ni tih F Rodingliana hian a sawi a. “Compensation-in kan rilru a hruai sual thui tawh a, tuna hydel project ruahman tum hoah hi chuan mi in ram a neih thar thut theih loh na turin ‘freeze’ vek a ni,” a ti.
Tlawng khuah tum bikah hian, an buaipui hma leh sawrkarin dan a siamthat hmaa ram nei sa an zirchiang hmasa a, huan lo ram neihna tlaka ngaih hectare 187 niin, neihna tlak loh hectare 2888 a awm a, compensation-ah insenso vak ngai lo tura ngaih a ni tih a sawi.
Tlawng leh Tuirini khuah tum bikah an beisei anga thil a kal tluan zel theih chuan, forest clearance atana sum senso ngai tur pawh budget-ah dah sa a ni tih a sawi bawk.
P&E minister sawi dang:
8 Tlawng Hydro Electric Project atan hian North Lungleng bulah tui khuah a ni anga, a tuikhuah (dam) san zawng hi metre 120 a ni.
8 Tuikhuah hian Thenzawl piah Ramlaitui/ Kawlhawk khua zawn vel thleng a chim dawn a. Village council engemawzat ram a chim dawn. Khua leh in engmah a chim buai dawn lo thung.
8 Tuikhuah hian million cubic meter 1009.6 a khawl thei dawn nia chhut a ni a, power siamchhuahna atana hman bak hi Aizawl khawpui chawmtu tui dahkhawlna a ni tel thei tura ngaih a ni.
8 Tuikhuahah hian sangha dah tel theih a nih dawn avangin, multipurpose dam angin, tourism lam atan pawh hman tangkai theih tum a ni.