Tlawng lei dawh January hapta hnihna velah thawh zawm dawn

Tlawng lei dawh January hapta
hnihna velah thawh zawm dawn
Tlawng lei dawh kai tawh mai tur, tlawlh leh ta chu kumthar January hapta hnihna velah hna chhunzawm leh chauh a ni dawn.
Mizoram State Project Monitoring Committee chu an chairman, chief minister Lalduhoma hoin Thawhlehni khan a vawi 4-na atan an thukhawm a. Lengpui Airport hna thawh mek umzui dan leh Tlawng lei dawh mek umzui dan report a ni.
Tlawng lei nawr kai an tumnaa an khai chhinna hrui chah chhan chu, pulley vir thei lo (pulley jam) vanga a hrui inbat chat ta nia sawi a ni a. Fimkhur lehzuala hna an chhunzawm leh tur thu contractor-te hian sawiin, hmanrua an lakhawm leh phawt anga, nakkum January hapta hnihnaa an thawh chhunzawm theih an inbeisei. Kawng erawh engtiklai pawha kaltlang theiha siam a ni.
Sawrkarin hmasawnna hna a thawhna tur hmun ram pass neih fel hmasak a tul thu, hna thawh zawh a nih hnua a enkawlna lam kalpui dan (SOP) neih a tul thu, works department ni loin civil construction works lian an khawihna hmuna harsatna awm, contractor hun pawhsei sak (extension of time) leh Project Monitoring Committee hmalakna a chak zawk theihnana rawtna lut te sawiho a ni.
Chief minister chuan Project Monitoring Committee thawhrimna fakin lawmthu a hrilh a. Report kimchang tak siam zel turin a chah. Project thawh mek, siamthat hleihtheih tawh loh chu thui tak an siamtha thei lo a nih pawhin, an sawrkar hnua hnathawh tur chin hu a tha tur a ni, tiin, “Tha taka endik kan tum ang. Ram hmasawnna tha leh tlo siam ngei kan tum tlat a ni,” a ti.
Thutkhawmah hian kumin September leh November chhunga project an endik ho report pek a ni a. An thil endika thil fel lo an hmuhte a thlalak nena enin, hmalak zui zel dan tur rel a ni.