Mihring leh lirthei chhuah thla

Hunpui a hnai a, hunpui hmang turin Zoram a inbuatsaih mek. Aizawl khawpuiah chuan mihring leh lirthei chhuah tam lai a ni.
Tunlaiin Aizawlah traffic a jam nasa a, lirthei tlanna kawng a tawt bakah kea kalna pawh a tawt thin. Kawngpui dung tia sawi phei chu a tawt nileng.
May thlaah khan traffic police te’n Aizawl khawpuia lirthei tlan zat an chhiar a, hmun lun lai Bazar Bungkawnah hian zing dar 7 atanga tlai dar 6 thlenga lirthei tlan zat an chhiar; chawlhkar khat chhung an chhiar a, ni tin lirthei 85000 a tlan ziah tih chu an hmuh dan a ni.
December-ah lirthei tlan a pung a, tun thlaah lirthei tlan zat chhiar lo mah se traffic police hotute chuan Bazar Bungkawna ni khata lirthei tlan hi nuai chuang daih a ni ang an ti.
An sawi danin, Zarkawt leh Zodin inkar hi lirthei pun zualna lai a ni a, heta a pun hian hmun dang a nghawng zel bawk.
“Zarkawt leh Zodin inkarah thiltih a punin traffic a jam nasa a, thiltih engmah awm lo pawh ni se mi kan bazar nasat avangin a jam tho ang,” traffic police hotu pakhat chuan a ti.
Lirthei a pun chuan mihring pawh an pung tihna a ni a, traffic police-te chuan kawngpui dungah chauh ni lovin veng hrang hrangah mihring kan chhuak nasa a, thiltih a tam a, kawngpuiin a zo lo an ti.
Mihring chhuak an pung a, traffic police te chuan kawng kan (cross) hi traffic ti-jam-tu pakhat a nih thu an sawi. A kanna tur hmun bik a awm a, chumi ni lo hmun danga kante avangin traffic a jam thin an ti a, mahni duh hun huna kan lova innghakkhawm deuhva kan ni se a ziaawm an rin thu an sawi bawk.