Sawrkar hnathawk leh pensioner-te thlamuang – ZPM Thalai

Sawrkar hnathawk leh
pensioner-te thlamuang
– ZPM Thalai
ZPM sawrkarah sawrkar hnathawk leh pension bakah hmeithai, rualbanlo leh upate thla a muang tih ZPM Thalai chuan an sawi
ZPM Thalai Hqrs. thuchhuak chuan, kum khat chauh rorelna a chan chhungin Mizoramah administrative reform leh mipui moral reform tam tak a thlentir hman a. Thawhrimna leh dikna hmangin chief minister Pu Lalduhoma leh a kaihhruai ZPM sawrkarin hmasawnna duhawm a thlenpui ngei an beisei tih a sawi. Mipui tan sawrkarin kum khat chhung leka bill 46 siam a, a pass theihna hian mipui sawrkar chu sawrkar chak leh chhuanawm tak a nih zia a lantirah a ngai tih a sawi a ni.
Kalphung thar, mipui sawrkarah mipui tana rawngbawltu sawrkar hnathawk thla a muang nia sawiin, ‘Sawrkar hmasa lama an dearness allowance (DA) an tih pun an pek theih loh chu sawrkar thar chuan a pe thei a. Sawrkar hmasaten a hun taka sawrkar hnathawk hlawh an pek theih loh leh DA-a an chanvo an pek theih loh avanga sawrkar hnathawk inzawmkhawm pawl, FMGE&W-in sawrkar nawrnan an auchhuah ngai fo thin chu tun sawrkarah chuan awm tawh loin, an hlawh leh chanvo dangte dan ang takin a hun takah an dawng thei a ni,’ ZPM Thalai hian a ti.
Sawrkar hnathawk pension-te tan pawh hma la in, sawrkar hmasaten kum 5 chhunga pension case 974 an tih fel theih laiin, ZPM sawrkar chuan kum khat chhungin pension case 7237 a chinfel sak a, sawrkar hnathawk mek leh pensioner-te tan nu leh pa nih tling sawrkar a nih zia a tarlangah an ngai tih a sawi bawk.
Hmeithai, rualbanlo leh upate tan theihtawpin sawrkarin hma a la a. Tun hmaa thlatin Rs.100 an dawn thin chu sawrkar thar chuan tipungin Rs 1000 an dawng thei ta tih sawiin, ‘Hmeithai leh pachhiate tana ding tlat, kalphung thar, mipui sawrkar hi ZPM Thalai chuan a thlawp zel dawn a ni,’ a ti.