Ni 5 chhungin nau piang 211 2024-a nau piang 16136

Mizoramah kum 2025 kan chuankai hnu, ni 5 chhungin nau piang 211 an awm a. Kum 2024 khan nau piang 16136 an awm. Economics & Statistics department chhinchhiah chinah, kumin January 1-5 chhung khan nau piang 211 an awm tawh a, heng zinga 111 hi hmeichhia an ni. The Aizawl Post-a tarlan tawh angin kumina nau piang zingah hian India rama nau piang hmasa ber pawh a tel a ni. Kumin ni 5 chhung hian Mizoramah mitthi 82 an awm tawh thung a ni.
Economics & Statistics department chhinchhiah danin, kum 2024 January 1 atanga December 31 thleng khan Mizoramah nau piang 16136 an awm a, mitthi 6536 awmin, mitthi aia nau piang an tam zawkna hi 9600 a ni.
Kum 2024 chhunga district hrang hranga nau piang zat tam dan indawt chu – Aizawl 6751, Lawngtlai 2416, Champhai 1431, Lunglei 1406, Kolasib 1159, Mamit 1048, Siaha 918, Serchhip 400, Saitual 319, Khawzawl 214 leh Hnahthial 74 a ni.
Kum 2024-a thihna thlentu chhinchhiah chinah cancer vanga thi 641, thawk lama harsatna (respiratory disease) vanga thi 532, lung natna (heart disease) 482, chetsualna vanga thi 216, mahni intihlum 58, thisen sang (hypertension) vanga thi 55, TB vanga thi 39 leh malaria vanga thi 26, thin lam natna vanga thi 27, Covid vanga thi 2 leh HIV/AIDS vanga thi 1 an awm a. An thih chhan chhinchhiah ni lem lo chu a tam zawk niin, 4457 an awm a ni.
Economics & Statistics department hian nau piang leh mitthi chhinchhiahtu tura ruat bik mi 881 a nei a, an ni hian zaah za an report lo thin a; kum 2024-a nau piang leh thi report lut dan hi zaa 89 chuang deuh niin, 2025-a nau piang leh thi report lut hi zaa 91 chuang a ni thung.