Hrileng tharah chiai lo turin mipui chah

Hrileng tharah chiai lo turin mipui chah
Tunhnaia hrileng thar nia sawi chu, hri chhuak thar ni lo, awm sa reng, tlang hrileng pangngai anga lang thin a ni a, chiai phahna tur a awm lo tih Health department hotute chuan an sawi a. Chutihrualin hrileng hrim hrim lakah mipui fimkhur a, zawm atana tha te zawm turin a chah.
Tunlai natna leng thar, Human Metapneumovirus (HMPV) chungchanga India ram leh Mizoram dinhmun thlirhoin Thawhtanni khan Health minister Lalrinpuii kaihhruaiin department hotute an thukhawm a, ruahmanna hrang hrang an siam. Health minister chairman-na hnuaiah he natna chungchang viltu tur ‘Core Committee on HMPV’ din nghalin, state level leh district tinah Rapid Response Team siam a ni a. Hriselna kawnga thawktute leh mipui hriat atan thuchhuah siam a ni.
HMPV hi tlang hrileng chikhat a ni a, kum danga leng thin ang tho a ni, tiin, tunah hian Karnataka state-ah naute thla 3 mi leh thla 8 mi ah hmuhchhuah a ni a, an dinhmun ngaihtuahawm a ni lo a, dam lam pan zelin pakhat chu damdawi in atanga chhuah a ni tawh tih sawi a ni.
‘He natna hi China chauh ni lo, khawvel pumah kumtin a leng a, kumtluana leng a ni a, hritlang satliah angin a langchhuak thin. Health department chuan IDSP kaltlangin he natna hi uluk takin a vil reng a, tunhnaiah Influenza like illness (ILI) leh Severe Acute Respiratory Illness (SARI) case tam thar thut report a awm lo,’ a ti.
ICMR leh a hnuaia laboratory hrang hrangin respiratory virus an test te – adenovirus, HMPV, RSV adt. positive pung thut a awm loa, Mizoramah pawh Zoram Medical College (ZMC) ah test theih tura inruahman a ni a; hetiang thil thleng thuta inralrinna, ram pum huap drill neih tawh chinah respiratory illness pun belh pawh nise, inpuahchahna tha tak neih a ni tih Health department chuan a sawi.
Health system leh surveillance network-in uluk leh fimkhur takin a vil reng a, hrileng darh palh thutah pawh hma la thuai thei turin Health department a inring reng tih sawiin, sawrkar damdawi in leh private hospital zawng zawngten IHIP report hmanga nitin hetiang ang case (ILI, SARI adt) an neih leh natna dang report a, uluk leh kim taka report turin sawrkar chuan a hriattir tih a sawi bawk.
Pneumonia natna thleng thei laka control programme/ SAANS campaign chu Mizoram district zawng zawngah kalpui mek niin, he campaign hi hlawhtling taka kalpui a nih theihnan thawktute leh mipuiin theihtawp chhuah turin Health department chuan mitin a ngen tih a sawi a ni.
Mipui pawh hetiang natna rinhlelh kai an awm a nih chuan, mahni awmna atanga hnai ber Sub-Centre /Health and Wellness Center emaw damdawi inah in-report thuai turin Health & Family Welfare department chuan a chah a. He hritlang natna hi tlang hrileng chikhat niin, kum danga leng thin ang tho a nih avangin chiai mai lo turin mipui an chah tih a sawi.