SASCI suma hnathawh dan thlirho Hna a tha tur a ni – Chief minister

SASCI suma hnathawh dan thlirho
Hna a tha tur a ni – Chief minister
State Level SASCI Committee chu an chairman, chief minister Lalduhoma kaihhruaiin Thawhlehni khan an thukhawm a, SASCI hmanga hnathawh mek leh thawh tur thlanfel tawhte an thlirho.
Chief minister chuan sawrkarin a thiltih tinrengah moral reforms a ngaihtuah thleng phak zel a, hna chhiate, sawrkar hnathawk inthlahdah lutukte an remti lo tih a sawi. SASCI leh fund danga thawh tur an thlan leh kut an thlak ve tawh chin chu a tha tur a ni, tiin, “A huna zawh ngei kan tum tur a ni a, revise ngai lo thei zel se kan ti bawk. Loh theih loha revise emaw hna zawh hun tur pawhsei a ngai a nih pawhin Project Monitoring Committee-in an endik hmasa zel ang. Hmasawnna hnathawh hi a tir atangin Monitoring Committee hian a vil zel dawn a, a mawhphurtute kan tan tlan hle a ngai dawn a ni,” a ti.
Sawrkar hmalakna tinrengah sawrkar hnathawkten an thawhpui that avangin lawmthu a sawi a ni.
Mizoram sawrkar chuan SASCI 2024- 2025 Part-1 atangin hmasawnna ruhrel pawimawh hlawm lian 8 chu cheng vaibelchhe 275 sengin a thawk dawn a. Hetah hian Central Jail and district jails 7 thawmthat; Aizawl Water Supply & Construction of 37 MLD Water Treatment Plant; Lunglei Water Supply Scheme tih changtlun; Aizawl Water Supply Scheme tih changtlun; district 11-a sawrkar school zirtirtu tan quarters sak; ITI Aizawl tihchangtlun; megawatt 60 pe thei Tuirial Hydro Electric Power thuamthat; Aizawla sawrkar quarters type 5&6 sak belh.
Heng bakah hian state sawrkar (UD&PA) in hna a thawh that avanga SASCI atanga pek (reform linked incentives) cheng vaibelchhe 300 hmangin hmasawnna hna hlawm lian 9-a thena thawh a ni dawn a. District khawpui tina tuihawk luankawr leh tuichhe luanluhna mumal zawk siam; MINECO-a Integrated Office Complex sak; Lunglei, Siaha, Serchhip, Lawngtlai, Kawnpui leh Bairabi-a sawrkar hnathawk awmna tur quarters sak; State Emergency Operation Centre & Public Safety & Disaster Relief & Communication System sak leh din; Vaivakawna bazar building changtlung zawk sak; Govt. Aizawl West College campus thar din; Directorate of Economic & Statistics dinna; IGC Complex Luangmual panna kawng thuamthat; Siaha, Serchhip leh Saituala Circuit House sak.
Land reforms lama Mizoram sawrkar (Land Revenue & Settlement) thawh that avangin sawrkar laipui chuan SASCI Part-7 atangin incentive cheng vaibelchhe 15.18 a pe a. Chumi hmang chuan Khankawn to Champhai kawng tih changtlun, Champhai leh Mamita DC Revenue office sakna atan hman tum a ni.
SASCI Part 10-a cheng vbch. 127 hmangin Khatla Aizawl, ZMC Falkawn, Champhai, ITI Aizawl, Ramhlun Sports Complex Aizawl, Ramthar Veng Lunglei leh Thenzawlah working women hostel sak a ni dawn a ni.
SASCI 2024- 2025 hnuaia thawh tur tarlan thenkhat hi sanction hmuh an ni tawh a. Hun tiam chhunga thawh zawh ngei tuma hmalak a ni dawn tih sawi a ni. Hna thawh that (reforms) lawmman dawn theih dang pawh dawn tuma hma lak a ni tih sawi a ni bawk.
2023- 2024 SASCI hnuaia hnathawh mek zingah cheng vbch. 500 senna, PWD hnuaia hna 117 zinga 91 chu zawh thawkhat a ni tawh a, hna dang pawh zawh thuai beisei a ni tih sawi a ni.