EPL – Team lian chak zawh loh zan

January 14, Thawhleh zan khan English Premier League (EPL) 2024-25 khelh chhunzawm a ni a. Thawhleh zan hi team liante chak zawh loh zan niin Liverpool, Manchester City leh Chelsea te an khingpuite nen an inhnehtawk vek. Liverpool an chak zawh lo hi an hnuaia awm team te tan lawmna a ni. Team lian an chak zawh loh laiin manager thar hnuaia inlan West Ham United in hnehna an chang ve thung.
Liverpool 1-1 Nottingham Forrest
Season kal mekah rin phak baka khel tha a, top 3 huang luah phak hialtu Nottingham Forrest mual City Ground-ah hmahruaitu ni mek Liverpool an lenglut hian ngaihven a hlawh hle. Pahnihnaa inthlangkai thei dinhmuna ding Nottingham Forrest hi vanneih vang renga chak chho tawk tawk nge an nih a, an phu vang renga hnehna chang thin an ni tih chu Liverpool lakah fiahin a awm. Reds lakah hian an that vang renga top 3 huang luah phak an ni tih an lantir a, hmahruaitu Liverpool in an si phurh sut hramin tlawm an pumpelh ta hram zawk.
City Ground-a inkhelah hian mualneitu Nottingham Forrest in bul an tan tha viau a, inkhel tan atanga minute riatna lekah Chris Wood chuan hmahruaina goal a thun nghal. Hma takah goal an thun vangin inrintawkna sang zawk nen an inlan a, an muala inlan an nih bawk vangin an phur hle bawk. Arne Slot hnuaia khel tha tak Liverpool in an si phurh sut tum viau mah se chawlhlawk hmain goal an thun thei lova, si khat faia hnufual zawk ni chungin chawlhlawk an hmang.
Chawlhlawk hnu lamah Reds in goal thun an tum ngawrh lehzual a, an hlawhtling ta nge nge. Darkar khat an khel chuang hret tihah Tsimikas siamsak atangin Diogo Jota chuan goal a thun a, an si phurh a sut ta nge nge. Jota goal thun hnu hian goal thun tumin an innawr tawn tasa viau a, hlauhawm siam ve ve mahse goal an thun belh thei lo tluan a, 1-1 in an inhnehtawk zui ta a ni.
An mualah uiawm takin chak zo ta lo mah se Nottingham Forrest hian an chunga awm Arsenal chu point khatin an lehpel a, pahnihnaah an inhlangkai. Nottingham Forrest mualah chak zo ta lo mah se Liverpool pawhin an hmahruaina point khatin an tichhah hret tho thung.
City 2-2 Brentford
Season kal mekah beisei anga khel tha tluang hleithei lo Manchester City chu Brentford hmachhawn turin Gtech Community Stadiu-ah an lenglut. Mikhual an nihna hmunah si hnihin hmahruai bawk mah se an hmahruaina an humhim zo lova, Brentford nen 2-2 a inhnehtawkin point hnih hlu tak an hloh.
Gtech Community Stadium-ah City leh Brentford in inkhel hmuhnawm tak an lantir a, goal pawh a lut har hle. Hun rei tak chhung goal thun thei an awm loh hnuin hun tawp dawn hnaih lamah goal li ngawt a lut a, mit a tlai leh zual. Hmasawn leh zual tura chak mamawh City tan hian Phil Foden chuan minute 66-naah Kevin de Bruyne siamsak atangin hmahruaina goal a thun. Season liam taah EPL player tha ber ni thei khawpa chetha Foden hi season kal mekah a khel tha tawk lova, bul a tan phak lo fo. Manager rinna hloh then bawk mahse Brentford lakah a chetha ta viau a, hmahruaina goal a thun hnuin minute 78-naah an goal hnihna a thun zui leh a, an hmahruaina a tizau.
Si hniha hma an hruai vangin City hi an chak ngei tura ngaih a ni hman. Chak theihna hun tha tak nei bawk mah se hun tawp dawn hnaiah an hmahruaina an humhim zo lova, goal hnih an chhuah. Mualneitu tan hian Yoane Wissa chuan minute 82-naah goal thunin an si phurh a sut then. Champion lai lakah goal an thun vangin an phur viau a, an mualah tha zawkin an inlan chhunzawm. Hun pangngaiah an si phurh sut thei lo mah se hun pek belh minute 90+2-ah Christian Nørgaard chuan Lewis-Potter siamsak atangin goal pawimawh tak a thun a, an si phurh a sut zo. Christian Nørgaard goal thun hnu hian goal dang a luh belh thei tawh lova, Brenford leh City te hi 2-2 in an inhnehtawk zui ta a ni.
Champion lai Manchester City laka point an hlawhchhuah hmangin Brentford hian hma an sawn hret a, 11-na atangin 10-naah an inhlangkai. Anni hian khelh 21 atangin point 28 an hmu tawh. Brentford lakah an chak zawh leh tak loh vangin City in hmahruaitu Liverpool hnaih hret an tumna an puitlin zo lo. City hian khelh 21 atangin point 35 an hmu a, paruknaah an awm mek. City hi hmahruaitu Liverpool nen an inkarah point 12 zet a tla zep der tawh.
Chelsea 2-2 AFC Bournmouth
Sum an sen hnem ngaihtuaha beisei phak lo thin Chelsea an insiamtha a, season laihawlah an rawn khel tha chho. Blues hian hmasawn chak viau mah se tun hnaiah chak an harsat leh ta tlat thung. Hmasawn tura chak mamawh Chelsea hi an mikhual AFC Bournemouth lakah an tlawm teuh hle a, hun tawp dawn tepa Reece James goal thun hmangin tlawm an pumpelh thei hram.
Chelsea hian an mualah bul an tan tha a, inkhel tan atanga minute 13-na lekah ball thiam leh fing Cole Palmer chuan Nicolas Jackson siamsak atangin hmahruaina goal a thun. Hma takah goal thun bawk mah se goal an thun belh thei lo reng a, an mualah ngei an tlawm teuh hle. Bournemouth pawh hian an phurh an sut thei lo reng a, hnufual zawk ni chungin chawlhlawk an hmang.
Chawlhlawk hnu lamah mikhual team an khel tha a, goal an thun zawn ta thung. Second half tan atanga minute ngana lekah Blues hian penalty an chawi. He penalty hi Justin Kluivert chuan a pet goal a, an si phurh a sut. An si phurh an sut hnuin Bournemouth an khel tha lehzual a, season kal meka khel tha tluang tak Antoine Semenyo chuan minute 68-naah hma an hruai letna goal a thun. He goal hi an chakpui teuh viau a, hun pangngai tawp thlengin hma a hruai. An mualah an tlawm teuh viau laiin Reece James chuan minute 90’+5-ah goal thunin an si phurh a sut hlauh a, an mualah vanneihthlak takin tlawm an pumpelh zui ta a ni.
West Ham an chak
Manager thar Graham Potter enkawlna hnuaia EPL an hmachhawn hmasak berah West Ham United chuan hnehna an chang nghal a, London Stadium-a an mikhual Fulham chu 3-2 in an hneh.
West Ham tan hian Carlos Soler chuan minute 31-naah hmahruaina goal a thun a. ‘Tomás Soucek leh Lucas Paquetá ten goal khat ve ve an thun bawk. Mikhual team Fulham tan hian Alex Iwobi chuan goal hnih a thun a, an team tlawm tur erawh a chhan him zo ta chuang lo.