Kuthnathawktute hmakhua vangin sawhthing leisak turin kan duhsak – Lal Thanzara

Kuthnathawktute hmakhua vangin
sawhthing leisak turin kan duhsak
– Lal Thanzara
Politics-a inbeihnaah chuan ZPM sawrkarin sawhthing leisak thei lo se, tih pawh awm thei a nih laiin, kuthnathawktute hmakhua avang zawkin lei thei ngei se an duhsak hle tih Congress president Lal Thanzara chuan a sawi.
Zirtawpnia Congress Bhavan-a inkhawmah MPCC president chuan, tun sawrkarin 2024 January leh December inkar khan cheng vaibelchhe 3393 a puk hman tih a sawi a. “Heti zat leiba nei chung hian engtin nge sawhthing an lei ang, engtin nge bana kaih policy an kalpui ang. Zokhuaa kuthnathawktuten an lo ring tawh si a, anmahnia innghatin mi tam takin sawhthing an ching a, an thar mah anga, hetiang leiba nei chunga an lei thei a nih chuan kuthnathawktute an lawmpuiawm takzet ang. Lei thei lo se, mualpho se tih chu politics-ah chuan thil awm thei ni mah se, kuthnathawktute hmakhua ngaihtuahin lei thei ngei se kan duhsak a ni,” a ti.
Mizoram political party-ah Congress tluka sawi tur nei tha an awm lo tih Congress hruaitu hian a sawi a. Remna leh muanna kan nei ringawt te chu a ropui em em a, tuna thalai tam zawk hi khatih laia hun harsatzia hre lo an ni tih a sawi.
“Mizoram politics hi thil tam tak a awm lem lo. Ruling chet that leh chetchhiatin a hril kawp zel. Vawiina ruling hi an chet that vak kan ring loa, BJP sum an hmang a, an BJP tak tak ngam si loa, an BJP tak tak ngam hun rual rualin an chhiatna hun a thleng dawn. A chhan chu, kan missionary-te talhfiak nen chanchintha hrilna kawnga harsatna an siamsak hi Mizo mipui zawng zawngin na kan ti a ni,” Lal Thanzara hian a ti.
Lengpui Airport din turin Congress ministry khan awm lo ata engtin nge awma a lo chan tir theih tih ngaihtuah a ngai tih a sawi a. Lengpui Airport atan cheng vaibelchhe 979 an hmuh hmangin an din tih a sawi. “Vawiinah sawrkar pumpa ve lemin, MNF pawhin harsatna an sawi kan hriat loh harsatna neia insawia IAF hnena hlan an tum hi Mizo mipui tan thil vanduaithlak a ni,” a ti.
Congress sawrkarin medical college tha tak a din chu ZPM sawrkar tirh phata an manganpui, an enkawl theih loh thu an sawi te chu thil zahthlak a ni tih a sawi a. Tuirial Hydel Project pawh Congress sawrkar bul tan niin, MNF-in an sum duh vanga sawpchhiat sakin, a hnuah an din thar leh tih a sawi. Congress sawrkarin thil kan tihpuitlintawh pawh sawrkar dangin an enkawl thei lo a nih chuan Zoram dungtluanah an auchhuahpui a ngai tih a sawi.
“Sum leh pai a ngah lutuka an va raid a, ka unaute pawisa ka kawl titu chief minister neitu nih pawh kha a zahthlakin a tlawm thlak. Chu chuan enge a kawh kan tih chuan, chiang takin corruption a kawk a ni. Engvangin nge chief minister khan khati zat zat pawisa kha a kawl, khawi ami nge a unaupa pawh khan a neih reng reng. Eng vangin nge ram nei hawt loin Tuirial Hydel Project chuanchhe vek turin ram nei anga insawia zak miah loa vaibelchhe tel pawisa laa an insem, heng aia seriuous hi ram development chunchangah a awm chuang lo,” MPCC president hian a ti.