Assam-in rat-hole mine khar tumin tan la

Assam sorkar chuan an state chhunga dan lova lungalhthei laih chhuahna (rat-hole mine) awmte titawp turin hma a la tan ta.
Dan lova siam rat-hole mine 13 chu an khar tawh a, a chhunga a laitu lo awm pathum chu Inrinni khan Assam sorkar leh Coal India Limited (CIL) tangdun chuan an man bawk.
“Rate hole mine zawng zawng khar turin hma kan la tan a. A zavaia ti tur chuan a awmna hmunte dap chhuaha tih nghal vek a har avangin hun a duh rei dawn a. Tunah hian heng thil laih chhuahna hmunte hi kan dap mek zel a, an hmanruate pawh kan mansak a ni,” tiin Dima Hasao Superintendent of Police (SP) Mayank Kumar Jha chuan a sawi.
‘Rat hole mining’ tia an sawi hi thil laih chhuahna khur siam danah chuan hlauhawm ber a ni a, leiverh zim tê siamin thawktute an lutin an chhuak thin a ni.
Hetiang laih chhuahna hmun bitum tur hian zing atangin thuneitute an thawk chhuak a. Margherita district Executive Magistrate Pritom Gogoi, Tinsukia Superintendent of Police Abhijit Gurav leh North Eastern Coalfields & Assam Power Distribution Company Limited hotu liante pawhin an ho.
Ningani khan Morigoan-a Assam Cabinet thukhawm chuan an state chhunga rat-hole mine awm zawng zawng chu khar vek tura hma lak ni se a ti a, hemi hi bawhzui nghal a ni.
Cabinet-in thutlukna a siam hma lawk hian Umrangso, Dima Hasao-ah hetiang lungalhthei laih chhuahna hmunah hian chhiatna thlengin thawk eng emaw zat an thi.
He chhiatna thleng kaihhnawihah hian mi 11 man an ni tawh nghe nghe.
January 6 khan he khurah hian tui a lut thut a, a chhunga thil laitu awm mek pakua an tang zui a. Chhanchhuah hna thawh nghal niin ruang pali an hmu chhuak tawh a, a dangte hi an la zawng zui mek.
Inrinni khan Assam Mines & Minerals Minister Kaushik Rai chuan thi pali chhungte hnenah hian ralna Rs nuai 10 theuh a hlan a. Mi dang panga la hmuh loh chhungte hnenah hian Rs nuai 6 theuh a hlan bawk a, an ruang emaw, anmahni emaw hmuh tuma beih zel a la ni.