January 24-a nau piang hmeichhia hnenah lawmpuina sumfai pe dawn

January 24-a nau piang hmeichhia
hnenah lawmpuina sumfai pe dawn
January 24 hi ‘National Girl Child Day’ a ni a. A lawmna atan Lunglei district-ah chuan he ni-a piang hmeichhiate hnenah lawmpui sumfai leh hmanrua pek tum a ni.
India rama hmeichhe naupangte chanvo humhalh a nih theihnana inzirtirna hunah kumtin January 24-a hman thin ni bik serh hran, ‘National Girl Child Day’ puala kumina ni sawm awh beihpui thlak tur chu Ni 15.1.2025 khan Lunglei district tan additional deputy commissioner Rochuangkimi Khenglawt hoin Lungleiah hawn a ni.
Addl DC chuan India ramah hmeichhiaten en hran, an chanvo rahbeh sak leh hnuaichhiah an tuar nasa tih a sawi a. Mizoram chu hmeichhe dinhmun thatna ber pawl ni mah se, hmasawn tulna tam tak a la awm tih a sawi. Kum tling loa inneih chungchangah hmeichhia chu a tuar nasa zawk an ni tih a sawi a; inchhung khurah hmeichhe naupangte dinhmun a hniam zawk thin dan a sawi bawk.
“Mipa leh hmeichhiaten dikna, chanvo leh zahawmna intluk tlang kan neih theihnan inzirtir nasat a tul a. Hmeichhiate chawikanna turin hmeichhia leh hmeichhia chauh inzirtir a tawk lo a, nu leh pa leh mipate pawh fanu te, farnute leh hmeichhe dang laka rilru puthmang dik zirtir an pawimawh a ni,” a ti.
A hawnnaah hian hmeichhiate zah a, en hrang lo a, an chanvo humhalhsak leh venghim tura intiamna thu chhamrual a ni a. Lunglei District Hub for Empowerment of Women-a district mission coordinator K Lalrinawmi’n NGCD campaign kalpui chhunga hmalakna tur ruahman a sawizau a ni.
Kumin NGCD thupuiah hian hma hun eng tak nei tura hmeichhiate chawi kan pawimawhna, “Empowering Women for a Bright Future” tih thlan a ni a. Ni 10 chhung hian hmeichhiate chawikanna atana hmalakna hrang hrang – district leh block level-a inzirtirna kawngzawh, thing phun, lemchan tawi (reel) insiamsiak, lem-thu (flyer) insiamsiak, hmeichhe zirlaite zinga hmeichhe hunbi kaihhnawih hriselna leh thianghlimna (menstrual hygiene) chungchang zirtir tum a ni.
January 24-ah a ni lawmna leh campaign kharna hman tum niin, hetah hian hmeichhe hlawhtling (local girl champion) te hnenah chawimawina leh intihsiakna hrang hranga tithate hnenah lawmman hlan a ni ang. Lungleia damdawi in pathuma nau neihna pindana dah turin nebulizer pakhat theuh pek tum a ni bawk.