Pakistan-ah sakhaw tibawrhbangtu mi pali thi turin ti

Pakistan-ah sakhaw tibawrhbangtu mi pali thi turin ti
Pakistan court chuan mipa pali, online-a an sakhaw sawi bawrhbanna lam chi tar langtute chu thi turin a ti tih prosecution lawyer chuan Thawhtanni khan AFP a hrilh.
“Zirtawpni khan court hian online-a Prophet Mohammed leh Koran sawi hnawmna lam hawi thil an thehdarh avangin thi turin a ti a ni,” tiin mi mal pawl, court-a thubuai thlentu, Legal Commission on Blasphemy Pakistan dan hre mi, Rao Abdur Raheem hian AFP a hrilh a ni.
“Kan thubuai hi an hmanraw (device) hmante endikna atangin chiang takin fiah a ni,” a ti bawk.
Mipa palite hi an khawpui, Islamabad bul lawk, Rawalpindi-ah hremna hi pek an ni.
Sakhaw sawi bawrhbanna hi Muslim tamna, Pakistan-ah hian an la na hle a, finfiahna chiang tak pawh a awm hmain a titu nia hriatte chu vantlangin an sawisak hlum mai pawh an awm thin.
Pakistan-ah hian online-a sakhaw tihbawrhbanna thubuai hi a pung hrim hrim a, mi mal pawl kal na zual eng emaw zatin mite chu hetiang tia puhin an khing nasa hle a ni.
Hetih lai hian hetianga an puhte tantu, an chhungte telna pawl pawh a awm tho va, tun tuma mi pawh hi court sang zawka ngaihtuah tha leh turin an thlen dawn niin AFP chuan a tar lang.
“An man dan leh an tih dan hi a hmaa hetiang thil thleng an tih dan nen a inang lo nasa,” tiin an member pakhat, a himna ngaihtuaha a hming tar lan duh lo chuan a sawi.
“Sorkar hi hetiang thubuai tam lutuk chhui tur commission din turin kan duh a, tuna kan kal danah hi chuan kan thalai tam takte hian an hun tha hi lung inah an hmang zo ringawt zel a ni,” a ti.