DRC-a Goma inchuhin hel leh sipai inbei nasa
DRC-a Goma inchuhin hel leh sipai inbei nasa
Democratic Republic of Congo khawpui pakhat, Goma-ah helho leh sipaite nasa takin an inbei mek.
“Khawpui chhehvela kan hriat chhun chu silai ri a ni mai,” tiin mi cheng pakhat, kartawp atanga an ina pawn chhuak thei lova tang chuan BBC a hrilh.
Mi chengte hian M23 helhovin Goma-a an kawtthlerpui bera patrolling an nei chu an tilang hlawm a, Pathianni khan Congolese sipaite nen inbei tanin mi sang telin an thenawm khuaah an chhuahsan phah.
Helho hian khawpui hi an thunun tawh niin an insawi a, Congolese thuneitute erawh chuan a la ni bik lo tih an sawi.
Tual chhung chanchinbumi, Prosper chuan sipai leh helho hi khawpui hmun thenkhatah an inkap tih a sawi a, “Kan hlau hle a ni,” a ti.
M23 hian Goma-a sorkar thupuan chhuahna, RTNC pawh an thunun tawh niin UN puiha din Radio Okapi chuan a sawi.
AFP chuan mi 17 vel thi an awm tawh a, mi 300 chuangin hliam an tuar niin a tar lang.
A hma lawkin DR Congo foreign minister chuan an thenawm, Rwanda-in M23-te pui tur hian sipai an tir niin a sawi a, a hnu lawkah hetiang hi a thleng zui ta a ni.
Rwanda erawh chuan M23 an puih loh thu an sawi a; mahse, Congolese thuneitute hian Kihali-a sorkar paihthlak a nih theih nan helho an pui zawk niin a sawi.
Kenya President William Ruto, East African Community chairman ni lai chuan inkahhai puang turin a ti a. DR Congo leh Rwanda president ve ve chu Nilainiah inbe nghal turin a ruahman.
Goma-a buaina a awm mek lai hian Rwanda-ah pawh hetiang bawk hi a thleng.
Goma nena an inrina bul mai, Gisenyi khuaah civil mi panga thah an ni a, mi dang 25-in hliam na tak an tuar bawk niin Rwandan sipai thupuangtu chuan AFP news agency a hrilh.
M23 hian ram leilung hausa tak, DR Congo khawchhak lam zau tak hi kum 2021 atang khan a thunun a. Tun hnaia inbeihna nasa tak thleng tharah Goma hi an pan leh a ni.
Kuminah ringawt North leh South Kivu-a cheng mi 4,00,000 chuang an tlanchhiat phah tawh niin UN refugee agency chuan a sawi.
UN hian Goma panna kawngpui lian dan a ni a, an thlawhna tumhmun lak hman theihin a awm rih lo bawk niin a sawi.
UN Secretary General António Guterres chuan Rwanda hnenah an sipaite chu DR Congo atanga ko haw tur leh M23 pawh kal zel lo turin a ngen.
DR Congo leh UN hian M23 hi Rwanda-in a pui ngei niin an ngai.
M23 hi kum 2012-a kum tam tak tihduhdah leh endawng tuar tawh, DR Congo khawchhak lama Tutsi mite hum tura indin an ni.