Mi 30 an thih hnuah Maha Kumbh-ah ruahmanna thar siam

Mi 30 an thih hnuah Maha Kumbh-ah ruahmanna thar siam
Hindu sakhaw punkhawmna lian, Uttar Pradesh-a Prayagraj khawpuia hman mek zelah innek buaina chhuaka mi 30 thia mi dang 60 zet hliam tuar an awm hnuah mipui himna tura dan leh kaihhruaina siam tam tak tihdanglam zui a ni.
An hmun thianghlim, Sangam bula innek buaina a thlen hnuah hian thuneitute chuan himna tur dan an zam thar nghal a. Thil lian tak tak panga tidanglamin punkhawmna hmun zawng zawng chu No-Vehicle Zone-ah a puang tel.
Maha Kumbh kal meka ni pawimawh ber pakhat, Mauni Amavasya-a inbual ngei tum mi maktaduai chuangte chu Nilaini zing khan an innek buai a, chhiatna lian tak a thleng a ni.
Maha Kumbh Deputy Inspector General (DIG) Vaibhav Krishna chuan innek buaina hi tui thianghlima inchiah ngei tum biakzinten a dalna an siam an bawhchhiat avanga chhuak niin a sawi.
Himna tur dan zam thara lian tak chu Maha Kumbh neihna hmun zau takah a zavaiin lirthei ei chi mah luhtir an phal tawh lo hi a ni a. VVIP-te pawh ngaihhnathiam an ni tawh dawn lo va, tuna luh phalna nei sa mek pawh tihtawp nghal vek a ni.
Pathian be tura kalte tan kawngpuite pawh hawi zawng inang chauhva lirthei tlan theihna an siam belh bawk a, a tawk zawngin a tlan theih dawn loh.
An district thenawm atanga Prayagraj lut turte chu a chhunga lirthei kal vel leh buaina dang a chhuah loh nan district ramri-ah an dang zel tawh dawn.
February 4 thleng chu lirthei ke li nei chi chu Prayahraj khawpuiah luh phal a ni rih dawn lo bawk.
Mipui pungkhawm enkawlna enpui tur hian IAS officer pahnih, Ashish Goyal leh Bhanu Goswami te chuan Prayagraj an thleng a. Anni pahnih hian kum 2019 khan Vijay Kiran-a te nen Ardh Kumbh-a pungkhawmte chu hnehsawh takin an lo thunun tawh.
Khatih hun lai khan Bhanu Goswami chu district magistrate niin kuminah hian Kumbh Mela Authority-a vice chairman a ni a, Ashish Goyal chu Allahabad commissioner a ni bawk.
Innek buaina a chhuah tawh lohna tur hian special secretary-rank officer panga, mipui pungkhawm tam lo hmachhawn tawh thinte dah belh an ni bawk.
Uttar Pradesh Chief Minister Yogi Adityanath pawhin mipui thununna tur te, lirthei vei vel ruahman thar dan tur te, department hrang hrang thawhhona tha zawk a awm theih dan turte a duang a. Hemi chungchangah hian chief secretary leh Director General of Police (DGP) pawh a kawm.
Nilaini tuka chhiatna thleng khan member pathum awmna judicial commission-in chhui turin thupek chhuah tawh a ni a. Commission-ah hian Justice Harsh Kumar, Director General thin VK Gupta leh IAS officer hlui, VK Singh te an tel.
Chief minister chuan thi chhungte hnenah ralna Rs nuai 25 pek an nih tur thu a puang bawk.