Pahnihnaah Barca

Nilai zana Champions League khelhah an mikhual Atalanta laka an chak zawh loh vangin FC Barcelona chuan mahruaitu Liverpool lehpelh theihna hun remchang an neih an chhawr tangkai zo lova, pahnihna ni chungin league round an khar.
FC Barcelona hian an mikhual Italian club Atalanta lakah chak theihna hun tha tak an nei a. An mualah ngei tum hnih ngawt hma an hruaina an humhim zo lo tlat thung. Catalan club lian Barca tan hian rawlthar duhawm Lamine Yamal chuan minute 47-naah hmahruaina goal a thun. An mualah hma an hruai vangin phur viau mah se an phur rei lo. Mikhual team tan hian Ederson chuan minute 67-naah goal thunin an si phurh a sut.
Goal khat ve ve an thun hnuin inkhel a hmuhnawn zui viau a, goal hnih hmuh tur a awm zui leh. Mualneit Barca tan hian Ronald Araújo chuan minute 72-naah hma an hruai nawn lehna goal a thun. Hma an hruai nawn leh vangin phur viau mah se goal an chhuah leh thuai thung. Atalanta tan hian Mario Pasalic chuan minute 79-naah goal thunin an si phurh a sut nawn leh. Inkhel hmuhnawm takah goal a luh belh thei tawh lova, 2-2 in an inthathen zui ta a ni.
Barcelona hi an mualah chak se hmahruaitu Liverpool nen point 21 ve ve an hmu ang a, goal difference-a tha zawk an nih vangin league champion an ni thei dawn. An mualah an chak zawh loh vvangin pahnihna ni chungin League round an khar a ngai ta thung. Atalanta pawh hi Barca lakah chak se pariatna nia last 16 lut chiang nghal tur an ni bawk a. Mimualah an chak zawh loh vangin pakuana chiah chiah an ni a, play-off an khelh zui ve a ngai dawn.