2024 Indian smartphone market-a hralh tam ber Vivo

2024 Indian smartphone market-a hralh tam ber Vivo
India smartphone market chu 2023 nena khaikhinin 2024-ah 9%-in a thang a, wholsale price basis a a thanna san ber tum niin market research firm Counterpoint chuan a tarlang. 2023-a Indian smartphone market-a roreltu Samsung chu 2024-ah pathumnaah a tawlh a, Vivo chu No.1 niin, Xiaomi-in a dawt. Apple chu a sum chevelah chuan a lian ber niin, iPhone 15 chu fourth quarter (October-December) chhunga India-a smartphone lakluh hnem ber a ni bawk.
Counterpoint Research report hi an company-in Monthly India Smartphone Tracker an buatsaih data atanga an siam niin, 2024 chhungin India-a smartphone chawk luh zawng zawng chu maktaduai 153 a tling a, smartphone manto deuh chi, Rs 30,000 man chunglam hralh a pung nasa zual a, Rs 10,000 man hnuailam hralhna a tlahniam ve thung.
Report atanga a lan dan chuan Vivo chu India a smartphone chawk luh tam ber niin, he dinhmuna a din vawi khatna a ni a, 2023 nena khaikhinin 2024-a an thanna cu 16% a ni. Chinese OEM dang, Xiaomi chu pahnihna niin, 2023 nena khaikhinin 2024-a an thanna chu 6% a ni. Hetihrual hian Samsung chu No.1 atangin No.3-ah a tawlh a, a manto deuh chi lamah a la chetha viau nain a man tlawm lamah a tlahniam ve thung a ni.
Oppo chu palina niin, 2023 nena khaikhinin 2024-ah an tlahniam a, an tlakhniamna hi 10% lai a ni. Kum bul lamah an chefuh lo a, mahse, kum tawp lamah an rawn invawrh thar leh ta a ni.
Apple chu No.5 niin, iPhone 15 chu phone malah chuan October-December chhunga lak luh tam ber a ni bawk.
Smartphone brand thang chak ber chu Phone 2a niin, 2023 nena khaikhinin 2024-a an thanna chu 577% lai a ni. He report-ah hian Motorola pawh an rawn thang leh bviau a, 2022 nena khaikhinin a let hnihin an pung a, 2023 nena khaikhinin 2024-a an thanna chu 82% a ni.
Offline lamah Realme an la che tha viau a, India-a offline sales zawng zawng a 52% an chang pha a, 2023-ah khan 49% an chang a, 2024-ah 52% an kai leh ta a ni. Feature phone market-ah Itel-in hma ruaiin, 32% an chang pha ve thung.
2024-ah khan 5G smartphone ralh a kal ber a, India-a lak luh thar zingah pawh 78% chu 5G smartphone niin, India-a 2024-a smartphone lak luh thar pali zela pathum chu 5G support handset a ni.
India smartphone market hi a thang chak hle a, smartphone manto deuh chi hralh a kal thar hle a, 2025-ah phei chuan Indian smartphone market hi dollar tluklehdingawn 50 pel tawh turin an chhut a ni.