Pathianni zing khan NBA regular season khelh chhunzawm a ni a, Madison Square Garden-a inkhel hmuhnawm takah Los Angeles Lakers chuan chuan New York Knicks chak tluang lai an titawp. LA Lakers an chak tum hian LeBron James chuan a la tar loh zia a lantir a, triple-double siamin a vul hle. Inkhel dangah MVP ni mek Luka Doncic chuan Denver Nuggets an chakpui ve bawk.
Madison Square Garden-ah Los Angeles Lakers leh New York Knicks ten inkhel hmuhnawm an lantir a, inhnehtawk takin bul an tan. Team hnihte hian quarter khatnaah point pawh an thawkchhuak tam dun nghal viau a, point 32 ve ve thawkchhuakin chungnung zawk an awm thei lo. Quarter khatnaah chungnung zawk an awm theih loh hnuin quarter hnihnaah LA Lakers an khel tha hret a, point 27 an thawkchhuak a, point ngaa hmahruai chungin chawlhlawk an hmang.
Inkhel bul tanna quarter hmasa ber ang bawkin second half tanna quarter thumnaah an inhnehtawk leh viau a, point pawh an thawkchhuak tam dun leh viau. Point 35 thawkchhuaktu Knicks chu point hnihin an chungnung ve thung a, an khingpuite nen an inkar an tizim. Point thuma hmahruai LA Lakers hi quarter hnuhnung berah an khel tha zui viau thung a, point 37 zet an thawhchhuah laiin an khingpuiten point 23 chauh an thawkchhuak thung a. Inkhel hmuhnawm takah point 128-112 in hnehna an chang a, vawi nga chak zawn tawh New York Knicks chak tluang lai an tihtawpsak.
Knicks an hneh tum hian LA Lakers player pawimawh LeBron James chuan point 33 lai a thawkchhuak a, ball sawhlet vawi 11 a dawn bakah assist vawi 12 zet a nei bawk a, triple-double a puitlin. NBA player ropui ber LeBron James hian a la tar loh zia mualchhungah chiang zawkin a lantir zui zel a. Game tin mai hian a ropuizia an nemnghet a, a hnuma tharte hian mi bik a nihna an tilang chian deuh deuh zel bawk.
LA Lakers hian player langsar an neih belh mai thei a, ri ret ret a wm mek. |um nga lai MVP ni tawh Dallas Mavericks star Luka Doncic chuan LeBron James-a khelhna LA Lakers hi a zawm dawn niin thuthang a awm mek. Doncic hi hliam vangin a chawl mek naa season kal meka hian Game tinah point 28.1 thawkchhuak ziah ang leh ball sawhlet vawi 8.3 dawng ziah ang a nih bakah game tinah assist nei ziah ang a ni. LA Lakers hian kum 40 mi lai ni tawh LeBron James hmunruak luahtu atan kum 25 mi Luka Doncic hi an duh niin tarlan a ni.
Pathianni zinga inkhel dangah MVP ni mek Nikola Jokic a ropui leh viau a, Charlotte Hornets an hneh tumin triple-double a puitlin.
Inkhel hmuhnawm takah Denver Nuggets hia an khingpuin Charlotte Hornets hi point 107-104 in an hneh thei hram. Harsa taka hnehna an chan tum hian Nikola Jokic chuan point 28 a thawkchhuak a, ball sawhlet vawi 13 zet a dawn bakah assist vawi 17 zet a nei tling bawk. Jokic hi season kal mekah a che tha tluang leh viua a, NBA Most Valuable Player (MVP) ni nawn leh thei dinhmunah a ding mek.
Pathianni zinga inkhel dangah Western Conference hmahruaitu Oklahoma City Thunder chuan an khingpui Sacramento Kings chu point 144-110 zetin an hneh. He inkhelah hian Thunder tan Aaron Wiggins chuan point 41 zet a thawkchhuak a, hei hi NBA a hmachhawn tawha point a thawhchhuah tam ber tum a ni hial a ni. Inkhel dangah khelh 16 chhung zet tlawm zawn tawh Washington Wizardspoint 105-103 in Minnesota Timberwolves an hneh a, hun rei tak hnuah an chak ve leh ta nawlh bawk.
LeBron James a la tar lo, a vul zel
Get real time updates directly on you device, subscribe now.
Prev Post