VC zingah kuhva tawlhru tanpui pawl an awm thin – K Sapdanga

VC zingah kuhva tawlhru tanpui pawl an awm thin
– K Sapdanga
Sawrkarin dan loa tawlh foreign kuhva a khapna kawngah tlawmngai pawl leh VC-ten police-te an thawhpui that viau laiin, VC thenkhat chuan sawrkar tih mualpho tumna vang nge, lo tanpui zawk an awm thin tih Home minister K Sapdanga chuan a sawi.
Thawhtannia ZPM office-a inkhawmah Home minister hian, foreign kuhva tawlhruk chingte ven kawngah police-te duty-na kawngpui chu an veng hneh viaua an inhriat laiin, police duty-te helna kawng ruk 28 an hmuhchhuak a, heng kawng ruk hi sawrkar hmasa atanga an rochun a ni, tiin, police tan ven sen a harsa tih a sawi.
“Khaw tam takah chuan tlawmngai pawl leh VC-ten sawrkar an venpui a, tlaivara duty-te pawh an awm. Hetihlai hian khaw thenkhata VC-te chuan kuhva tawlhtute hi an tanpui zawk niin kan hria a, sawrkar tihmualpho tumna pawh a ang viau. Hengte avang tak hian VC inthlan thar hi a nghahhlelhawm,” a ti.
Foreign kuhva phurh luh an khap chhan lian tak pahnih a awm tih K Sapdanga hian a sawi a. Kan ramah kuhva huan siama eizawng chhungkaw sing chuang awmten an kuhva thar an hralhna lamah harsatna an tawh phah a, foreign kuhva a ruka phurh luh chu khap a ni tih a sawi.
Chhiah awl rukna sum, black money tam lutukin ram dinhmun a ei chhe chak em em tih sawi bawkin, “Dan anga sumdawngten sawrkarah chhiah pea sum an tuak chhuah laiin, smuggling hmanga sumdawngten chhiah pe ve loin, foreign kuhva hmangin black money an siam zung zung a, an hausa thur thur a; an black money chu white money-a chantir turin in leh ram to tak takin an lei a, smuggler ten hmun tha lai lai an lei pawp pawp a, chu chu ram neitu dan zawmtute tan a pawi em em a ni,” a ti. Smuggling kuhva khap a nih vangin in hmun man pawh a lo tlahniam leh tawh niin a sawi.
Ngawhngawl zual, zan khawthima kawngruk zawh talh chingte laka tun sawrkarin smuggling kuhva an man tlingkhawm chu, an sawrkar hma lawka ni khata an tawlh thin zat deuh thaw a ni tawh tih a sawi a ni.
Hunpui laiin halpuah leh halmawi khapna sawrkarin thupek a chhuah a, khapna thupek bawhchhiatna thubuai 52 ziahluh niin, he thubuai hian mi 60 a hmer tel tih Home minister chuan a sawi.
“Heng mite chargesheet-na hi court-ah thehluh vek tawh a ni a, court-in eng angin nge a bawhzui dawn kan nghak mek. Sawrkar khapna thupek zawma halpuah hal miah lo veng thahnem tak an awm laiin, thupek bawhchhia veng tlemte an awm a. Bawhchhiatna vengah pawh thupek bawhchhetute kha veng khatah in 5 vel lek lek an ni a, a bawhchhe chhunte khan hal an chak vang hrim hrim ai mahin, sawrkar thupek tihtlawlhna atan thahnemngai takin an hal niin a lang. Khapna thupek September thlaa puan kha kan zawm kim teuh viau a, kuminah chuan January thlaah khapna thu rel fel a ni tawh a, zawm theuh turin mitin kan ngen a ni,” a ti.