Sawhthing lei turin Saitual inpeih

Sawhthing lei turin Saitual inpeih
Mizoram sawrkarin kumin February 20 atanga sawhthing lei a tumnaah Saitual district chu lei turin a inpeih tawh.
District Agricultural Marketing Committee Saitual chu an chairman, district bawrhsap Dr Lalngura Tlau kaihhruaiin Thawhlehni khan an thukhawm a. An district-a Secondary Collection Centre ruahman sa khaw pathum – Saitual, Keifang leh Hliappui bakah Collection Centre thar tur pali – Ngopa, Phuaibuang, Suangpuilawn leh Phullen a hmalak zui dan tura inrawnkhawm a tul avanga thutkhawm hi koh a ni tih a sawi.
February 20 atanga sawhthing lei/ hralh chhuah a nih tawh dawn avangin Saitual district-a Collection Centre pathum – Sihfa Multipurpose Farming Society, Mualpheng Multipurpose Farming Society leh Hliappui Multipurpose Farming Society an inpeih tawh a. Chutih rualin, centre thar siam belhte erawh a rem dan ang anga hma lo la a, training pawh a rang thei anga inko thuai a tul tih a sawi a ni.
Secondary Collection Centre hi pathum (3) tura ruahman hi pasarih (7) a awm dawn ta a, heng siam thar zingah hian Phuaibuang leh Suangpuilawn Collection Centre tur leh enkawltu tur society an la neih loh avanga la tihchian tura dah niin, DAO lam lo bawhzui tura rel a ni.
Thawhlehni vek khan District Agricultural Marketing Committee Mamit pawh an chairman, district bawrhsap K Laltlawmlova kaihhruai thutkhawm a ni a. DAMC-in a hma a lak dan tur sawiho a ni.