Bible Thu Hlawmte tichhuak

Bible Thu Hlawmte tichhuak
Mizoram Synod Literature & Publication Board (SL&PB) buatsaih ‘Bible Thu Hlawmte (Topical Bible)’ tih chu Thawhlehni khan Synod moderator Rev. R.C. Lalnghakliana’n a tlangzarh.
Synod moderator chuan lehkhabu thar chu a chhiartu apiangin thlarau lamah hlawkna an hmuh theuh theih a duhsak tih sawiin, Pathian hnenah tawngtaiin a hlan a. SL&PB editor Rev PB Zosapthara’n lehkhabu buatsaih dan leh nih phung tlangpui a sawi.
2013 October-a SL&PB Board Executive Committee (BEC)-in Topical Bible Concordance siam a rawtna chu SL&PB Committee-a thlen a ni a. SL&PB Committee hian rawtna hi pawmin, hma la zui turin BEC chu a ruat leh a ni. BEC hian bawhzui turin Sub-Committee a din a. 2022 May-a SL&PB BEC thukhawm chuan Topical Bible Concordance project hi tharthawh a rel a, a project hming pawh ‘Bible Thu Hlawmte’ tih a ni. A buaipui tur hian Upa C Lalbiaknunga, Durtlang North ruat niin, a ni hian lehlin leh thil tul dang a buaipui a ni.
‘Bible Thu Hlâwmte’ hi Orville J Nave buatsaih, Nave’s Topical Bible behchhana siam a ni a, phek 2244-a chhah, thumal/thu hlawm thlur bing (entry word) 4628 a awm a; thumal (word) awm zawng zawng hi 15,37,759 a ni.