Nunphung hrisel nei tura midang zirtirtu atana an duhte kokhawm

Nunphung hrisel nei tura midang zirtirtu atana an duhte kokhawm
Nun hlim leh tha neih theihna atana kan nitin nunphung hrisel neih a tul zia inhriilhtharna atan Health & Family Welfare department-a Mizoram Health Systems Strengthening Project (MHSSP) chuan Zirtawpni khan special workshop an buatsaih.
Mizorama mi lar leh entawntlak thlan bik, thiamna hrang hrang neite kalkhawmin, an ni hi ‘Healthy Lifestyle ambassador’ atan ruat an ni a. Health & Family Welfare principal director Dr Vanlalsawma chuan tunlaia Mizorama thihna leh natna, thisensang, zunhlum, cancer, stroke leh lungphuchawlin Zofate min run nasa tih sawiin, social media chak tawh zia leh influencer-te hlutna sawiin, department-in program hrang hrang hmanga hnathawhnaah milarte nen thawhho a tul tih a sawi a ni.
MHSSP project director, NHM mission director Dr. Eric Zomawia chuan workshop neih chhan, nundan hrisela kan nun loh avanga natna leh a hunloa thihna awmchhan sawiin, kan inven theih dan leh inenkawl dan leh mimal theuh tih tur leh tihtheih a sawi a. Kan nunna chunga thuneitu chu Pathian a nih rualin, nundan phung dika kan nun chuan thui tak kan pawtsei ve thei a ni, tiin a sawi.
MHSSP consultant Ruth Lalawmpuii chuan community intervention – Damna Kawl Eng hnathawh dan sawiin, district 6-a khaw 510-ah hma lak mek niin, damna kawl eng hnuaia SBCC hnathawh pakhat zinga mass media hnuaiah ‘Walkathon 2025’ buatsaih tum a ni a, district 5 leh heng khaw 510-ah February 15 atanga March 10 inkarah hman a ni dawn a, Aizawlah a kharna leh a hunpui ber March 21-a hman tum a ni tih a sawi.