Influenza leng nasaah fimkhur turin Centre-in ti

Seasonal influenza subtype H3N2 leng nasa mek zelah Centre chuan State thenkhata Covid-19 kai pung chu a ngaihven thu sawiin India ramah Covid-19 kaithar tun hnaiah 456 hmuhchhuah a ni a.
Centre chuan States leh Union Territories te chu influenza-like illness (ILI) or severe acute respiratory infection (SARI) leng mekah operational guidelines for integrated surveillance of respiratory pathogens zawm turin a ngen a.
State te chu damdawi In te inralring renga siam tur ngen bawkin damdawi leh medical oxygen, vaccination converage te Covid-19 leh influenza lakah kalpui turin a ti bawk.
“Covid-19 chu tun hnai thlaah nasa takin a tlahniam chungin tun hnai teah Covid-19 test positive state thenkhatah an pung leh hi ngaihven vat ngai a ni,” tiin Union Health Secretary Rajesh Bhushan chuan State leh UT te hnena lehkha a thawnah a tarlang.
Hripui kaithar an tam lo chung leh damdawi In panpui ngai an tam lo chungin Covid-19 vaccine pek chu chak taka kalpui mek reng a ni, tia sawiin Bhushan chuan test, tract, treat, vaccination pek leh Covid appropriate behaviour zawm thatte chu kalpui zui zel tur a ti bawk a.
Tun hnaiah ILIs leh SARIs te State leh UT thenhatah te hmuh tam a nih thu sawiin he mi kaihhnawihah hian central ministry, department leh organisation inhnamhnawih te chuan inhmuhkhawmna an nei zui nghal tawh bawk a.
Influenza leng mek chu hun inthlaka kum tina leng thin ang anih thu sawiin khawchin danglam azira leng nasa thei a nih thu an sawi a. Hei vang hian personal hygiene ngaih pawimawh loh te, khuh lam insum karna neih loh te, punkhawmna hmuna awm khawm tam te chu viral respiratory pathogens heng Influenza A (H1N1, H3N2 etc.) leh adenoviruses te tidarh nasatu an ti bawk a.
ILI leh SARI bikah nikum December thla laihawl atang khan Influenza A pung zelah integrated sentinel-based surveillance kalpui a nihsa tawh thu an sawi bawk.
“Influenza A (H3N2) sample a hmuhte chu lab hrang hrangah enfiah a ni tawh a. Hriatreng tur chu naupang, kum upa leh co-morbidities nei te tan H1N1, H3N2, adenovirus te a hlauhawm zual,” tiin tarlan a ni bawk.
January 1 atang khan viral research and diagnostic labs (VRDLs) hrang hrangah respiratory sample test a sample 25.4% chu adenovirus kai an ni tih finfiah a ni, tiin tarlan a ni bawk a.
Heng hri kaitu tam ber te hian an la na lo va, mahni inenkawl pawha dam mai theih leh khuh leh khawsik satliaha an neih mai chauh laiin thnekhatah chuan a bik takin kum upa leh thau uchuakah te leh co-morbidities nei leh rai laiah te chuan na zawka thawkin damdawi ina enkawl an ngai hial a ni, tiin Bhushan chuan a sawi bawk a.
“He natna hi a darh zel loh chuan community awareness kalpuia hand hygine tha leh hetiang hritlang kaite chuan midang an kai loh nana midang te nena inhnaih chilh loh chu tihmakmawh a ni,” tiin Bhushan chuan a sawi bawk.