By Mahmuaka Chhakchhuak
-- Advertisement --
Lunglei Municipal Council chu kan nei tak tak dawn tain a lang a, hmasawnna rahbi pawimawh tak a niin tunah nei lo mah ila, nakin lawkah chuan kan la neih ngei ngei tur tho nia ngaih a ni. Amaherawhchu Lunglei khawpuia chengte hian tunah rih chuan Municipal hi an nghakhlel tehchiam pawhin a hriat lem loh a, Sorkar lam atang chuan nei ngei tura hmalakna a awm si avangin loh theih loha hmachhawn a ngai dawn ta niin a lang thei bawk ang. Sorkar lam atanga kan thu hriat hmasakah chuan Nov. 16, 2021 daih tawhah khan Chief Minister Zoramthanga hoa Council of Minister thukhawm chuan LMC din an lo remti tawhin Ward pawh sawm leh pakhat (11) awm tura ruahman a niin November 22, 2021-a Mizoram Gazette-ah pawh tarlan a ni. Chutiang bawkin UD&PA changtu Dy. CM Tawnluia chuan kumin (2022) chhung ngeiin Lunglei Municipal Council (LMC) inthlan buatsaihtir an tum thu May 13, 2022 ah khan alo sawi tawh bawk a. Hetiang a nih takah chuan engtikah nge ni ang tih chu mi tinin kan ngaihven a niin Sorkar thuchhuak kan thlir chhung pawh a rei ang reng viau a nih kha.
Amaherawhchu beisei angin thil a kal lo nge, inbuatsaihna a muangchang ang reng riaua hriat a niin March 2, 2023 niah State Election Commissioner Laima Chozah, IAS (Rtd) chuan Lunglei DC Conference Hall-ah Lunglei Municipal Council inthlan neih tur chungchang a puang chauh a nih kha. State Election Commissioner hian inthlanna neih tur chungchang a puan rual hian hmeichhe tan seat 33% zuahsak a nih thu a puang nghal bawkin seat sawm pakhat (11) awmah seat pali (4) chu hmeichhe tan tih a ni. He inthlanna neih turah hian Polling Station 44-a awm ang a, Nomination file theih hun tawp atan pawh March 10, 2023 (Zirtawpni) a ni ang. Tichuan, March 13, 2023 ah Nomination endik a ni ang a, a tuk March 14, 2023 chu Candidate te inhnuhdawk theihna hun tawp a ni bawk dawn a ni. March 15, 2023 chu Symbol inpek leh Contesting Candidate list puanzarna hun a ni ang a, March 29, 2023 (Nilaini) chu vote thlak ni a ni ang. Vote thlak that a ngaih chuan a tuk, March 30, 2023-ah thlak that a ni ang a, harsatna dang a awm loh chuan April 3, 2023 chu Vote tlate chhiarna hun a ni ang.
Hetianga inthlan puan a nih takah chuan Political Party hrang hrangte chuan phurthak kai ang maiin an che neuh neuh nghal a, chhun leh zan chawl loin Candidate tur chungchangah ngaihtuahna an hmang tan nghal niin a hriat. Chutih rual chuan |halai President meuhin a awmna Party chhuahsanin Party dang a zawm thu hriat a niin social media lamah a darh chuai chuai nain sawizui erawh a hlawh lo viau em ni tih tur a ni a, a chhe zawng leh a tha zawng pawha sawizuina a awm lo viau chu a mak ang reng hle mai. Councillor tur atana Party hrang hrangin an sawm rawn mi engemawzat an awm a, pakhat phei chu an inbiak rem tak tak hmain Party hruaitu pakhatin WA Status ah a lo hmang a ni awm a, chu chu Party dangin an bawhzui vat tih thawmte hriattur a awm bawk. A tlangpuiin Party chhungkua atanga vawrhchhuah tur mi leh sa nghet an tam lo nge ni Party awn lam nei lo (neutral) lam atanga vawrhchhuah an tam berin a hriat a, Party pali zingah Congress Party hian an Party mi leh sa nghet pangngai Candidate an ngah ber mai awm mange tih tur a ni.
Political Party zingah Congress Party chuan thawm an nei hmasa berin Candidate an puang chhuak hmasa ber a, March 8, 2023 niah khan an Party Office-ah Lunglei Municipal Council inthlanpui lo awm tura an Party Candidate te puangin Party President Lalsawta’n Ward I atanga Ward XI Candidate-te chu phur takin a puang a. Mi sawm leh pakhat zingah Zoram khawvela hriat hlawh tak Lalenkawli Pautu hming lang tel ve chuan titi a siam tam nghal viau mai a, social media lamah pawh sawizui a hlawh viau a ni. Party dangte pawhin an sawm viau naa Congress Party Candidate ber kher a duhna chhan hi engnge ni ang tih chu zawhna lian tak awm a niin social media lamah chuan ‘A tling ngei ngei ang’ tia sawi a niin a chhe zawnga sawina hmuh tur a awm meuh lo chuan dinhmun sangah a chuangkai dawn em ni tih zawhna a awm phah hial. ZPM pawhin March 9, 2023 (Ningani) ah khan Candidate an puangin K. Sapdanga, Working President chuan Ward I – XI Candidate te chu an Party Office-ah a puang a, chawhnu lamah an Party zawm tharte lawmluhna hun hman a ni bawk.
BJP pawhin Ward sawm leh pakhatah hian Official Candidate an neiin MNF Party pawhin March 9, 2023 niah khan Saikuti Hall-ah an Party Vice President hoa Official Candidate puanna hun hman a ni. Veng lian zingah chuan College Veng leh Salem Veng atanga Candidate vawrhchhuah an awm loh laiin Rahsi Veng atangin mi pasarih an awm thung a. Hmeichhe Ward atana pawh fuh Ward pali bakah hian ZPM Party chuan Ward I, General Ward-ah Hmeichhia an vawrhchhuak bawk. Candidate-te reng reng hi a tlangpuiin Party-a awm nghet sa an ni loin Party hrang hrangin an sawm rawn an niin Politics lama tawn hriat la nei tam lo hi an tam ber a. MNF Official zingah Ward – III-a Candidate F. Lalsawmkima hi Sub. Hqtr. Party Vice President ni lai niin Candidate dang zawng aiin a langsar thei ber awm e. Nimahsela chu chuan boruak a neih that phah ang em tih chu hriat thiam har tak a ni thung a, Congress leh ZPM Party te Candidate te hi an buk a rit viau thei bawk. Kum lamah chuan Ward – XI-a Congress Party Candidate H. Lalnunmawia hi a upa berin a rinawm a, kum 65 vel nia sawi a ni.
Party Official Candidate-te hi an zavai hian mi fel leh chhuanawm tak an ni hlawm a, khawtlang leh Kohhrana mi tangkai tak tak an ni hlawm bawk. Ward mal anga sawi chuan Ward IV-ah hian Candidate an tha berin a rinawm a; Congress Candidate Joseph R. Lalremngheta hi VC atana vawi thum lai lo thlan tlin tawh niin tuna Venghlun VCP ni mek a ni bawk a, MNF Party Candidate, Zoramdina Ralte lah hi Kohhran Upa niin veng chhungah pawh mi hriat hlawh tak a ni bawk mai bakah chhungkuaa mi fak hlawh tak an ni. ZPM Candidate R. Lalramzauva pawh hi MLA Candidate te hial lo ni tawh niin Party tana mi tangkai tak a ni a, vawrh chhuah awm tak an vawrh chhuak bawk niin a hriat.