Sawrkar leh kohhran duh loh anga sum lalut mi hnawl turin kan inngen

Village council/ local council inthlan tura candidate zingah sawrkar leh kohhran duh loh zawnga sum lalut mi hnawl ngam turin Mizoram People Forum chuan vote nei mipui a ngen. MPF Gen. Hqrs. chuan LC/VC inthlan turah thuchah siamin, candidate zingah sawrkar leh kohhran duh loh zawnga sum lalut mi an awm a nih chuan eng party mi pawh ni se hnualsuat a, vote lo ngam turin voter-te a ngen tih a sawi a. Mi rinawm, therhlo leh corruption sum laka inthiarfihlim ngam mi kan thlan chhuah theihnan political party mi nihna dah boin mi dik leh rinawm thlang turin voter-te a chah.
‘Khawtlang rorelnaah party duh dan aia Pathian duh dan ngai pawimawh tur mi thlang ila; chhungkhat, vua leh vang leh thiantha nihna dah boin Pathian tih tak tak mi vote ang u,’ MPF chuan a ti a. Veng leh khawtlangah Pathianin lalna a chan theihnan inthlan boruak chu Pathian dah lalna atana hmang tur leh,candidate-te pawh Pathian leh mahni lawina kohhran inkaihhruaina aia party hruaitute duhdan dah lal lo zawk ngam turin MPF chuan a ngen tih a sawi a ni.
‘Tualchhung rorelna hi zim angin lang mah se, kan ram kal zel dan tur hlimthla a nih theih avangin vote nei tawh phawt chu he inthlana vote thlak turin kan ngen a. Chu chu Pathian mite awm dan tur a ni tih Lal Isua zirtirna leh Paula zirtirnaah kan hmu. Mahni chenna zimte tan pawha khua leh tui mawhphurhna kan hlen thei lo a nih chuan, khawtlang hruaitu tha neih kan beisei thiang bik loang. Khawtlang hruaitu tha siam turin i pawimawh a; tha tehna atan party leh chhungkhat nihna aiin Pathian tihna a pawimawh zawk tih hre theuh ang u,’ thuchah chuan a ti.
MPF president Rev RC Lalnghakliana chuan, kan ram politics tihthianghlim kawngah mipuiin MPF an thlawp tha thin a, Pathian malsawmna an dawn phah fo tih sawiin, khawimaw laiah seltu awm zeuh mah se, mipui nawlpuiin an thlawp that avangin khawtlang hruaitu leh ram hruaitu atan political party tinin mi tha, Pathian tih mi, an dah pawimawh tial tial chu a hlu hle tih a sawi a. Kan ram politics tithianghlim zel tur leh sawrkar tha kan neih theihnana MPF hmalakna kawngah thawhpui chhunzawm zel turin mitin a sawm tih a sawi a ni.